Таатта улууһугар быйылгы ыһыах саха сэбиэскэй литературатын төрүттээччи, уһулуччулаах бэлитиичэскэй диэйэтэл Былатыан Ойуунускай төрөөбүтэ 125 сылыгар ананар. Улуус култуураҕа уонна духуобунай сайдыыга управлениетын салайар Гаврил Вырдылин иһитиннэрбитинэн, ыһыах бэс ыйын 15-17 күннэригэр ыытыллар.
— Талыы-талба Таатта үс күннээх үрүҥ тунах ыһыаҕын бастакы күнэ ытык киһибит, улуу убайбыт Ойуунускай төрөөбүт сиригэр-уотугар Чөркөөххө, иккис, үһүс күннэрэ Ытык Күөлгэ Хадаайы сыһыытыгар буолар. Сиэри-туому толорууга 1000 киһи кыттыыны ылыаҕа. Уопсайа 13 араас куонкуруска 150-ча киһи сайаапкатын киллэрбитэ. Улуус алта нэһилиэгиттэн быыппастар былчыҥнаахтар, быһыйдар, сымсалар хамаанда тэринэн спортивнай күрэстэргэ күөн көрсөргө бэлэмнэр. Маны сэргэ, үс күннээх ыһыахха нэһилиэктэр “Дьулуруйар Ньургун Боотур” олоҥхо тоҕус ырыатын барытын куолаан толоруохтара, — диэн эттэ.
Таатта дьоно үрүҥ тунах ыһыахха ох курдук оностон, кустук курдук куоһанан, ыһыаҕы көрсөргө бэлэмнэр. Күүтүүлээх мааны ыалдьыттары ыһыах алгыһын иҥэринэргэ, аламай күн сыралҕаныгар дуоһуйа сыламныырга, киэҥ түһүлгэни төрүттэһэргэ ыҥыраллар.
Биһиги корр., «Саха сирэ» хаһыат, edersaas.ru
Хаартыска: интэриниэттэн
[vc_video link=»https://youtu.be/gcvImO2JXbw»]