2014 с. бэттэх аан бастаан Сбербаан ипотека бырыһыанын үрдэттэ. Үгүс бааннар өссө эрдэ кирэдьиит ыстаапкатын улаатыннарбыттара. Сыл бүтүөр диэри ипотека 10% тиийиэ диэн сэрэтэллэр. Онон дьиэ атыылаһарга чэпчэки ипотека кэмэ бүттэ дэһэллэр, бу эйгэҕэ үлэлиир дьон.
Кирэдьиит бырыһыана саҥа киирбит сайаапкаларга эрэ үрдүөҕэ. Сбербаан ипотекатын алын кээмэйэ бэлэм дьиэни атыылаһарга сылга 8,6 % — 9,2 %, тутулла турар дьиэҕэ 7,1-7,5 % диэри үрдээтэ.
Киин баан балаҕан ыйыгар түөрт сыл иһигэр сүрүн ыстаапкатын 7,5% тиийэ үрдэппитэ ипотека бырыһыана үрдүүрүгэр төрүөт буолла. Ону кытта тэҥҥэ Сбербааҥҥа харчыны уурдарыы бырыһыана атырдьах ыйын бүтэһигэр уонна алтынньы ортотугар иккитэ үрдээтэ.
Сбербаан дойду сүрүн баана буоларын быһыытынан, бэриллибит ипотека 50% кини ылар. 2018 с. саҕаланыаҕыттан уопсайа 1,1 трлн солк. суумалаах ипотеканы биэрбит.
Онон дьиэлэрин кэҥэттэр санаалаах дьон ипотека бырыһыана өссө үрдүөн иннинэ кыбартыыра атыылаһарга тиэтэйэллэр. Кирэдьиит ыстаапката аһары үрдээтэҕинэ, дьиэ-уот ырыынага эмиэ хас да сылга тоҥон турар кутталлаах.
Марианна Тыртыкова, «Саха сирэ», edersaas.ru