Бүгүн хара сарсыардаттан Сбербаан Саха сиринээҕи килийиэннэрэ банкоматтан пластиковай каарталарыттан сатаан харчы устубакка, үгүс киһи айманна, күннээҕи былаана алдьанна.
Анивера АКИМОВА, «Саха сирэ» хаһыат, edersaas.ru
Бу биһиги эрэ өрөспүүбүлүкэбитигэр маннык балаһыанньа үөскээбэтэҕин туһунан Сбербаан исписэлиистэрэ иһитиннэрдилэр. Холобур, Приморскай, Алтайскай кыраайдарга уонна да атын регионнарга Сбербаан үлэтигэр тиэхиньиичэскэй алдьаныы тахсан, килийиэннэр сатаан харчыларын устубакка сылдьаллар. Инньэ гынан, баан үгүс офистарыгар уочарат улаатта, кэлии-барыы хойунна.
Үөскээбит быһыыны-майгыны чопчулаһаары, Сбербаан Саха сиринээҕи филиалын пресс-сэкирэтээрэ Жанна Никоноваҕа сибээскэ тахса сылдьыбыппытыгар:
«VISA ханаалларыгар быстах кэмнээх тиэхиньиическэй «сбой» тахса турар. Билигин номнуо баан үлэтин чөлүгэр түһэриигэ үлэ ыытылла турар. Онон баан килийиэннэриттэн бырастыы гыналларыгар көрдөһөр», — диэн хардарда.
Анивера АКИМОВА, «Саха сирэ» хаһыат, edersaas.ru