Дьокуускай куорат Думатын Кубогар волейболга күрэхтэһии быйыл төрдүс төгүлүн ыытылынна. Алтынньы 7-8 күннэриттэн саҕаламмыт күрэскэ киин куорат үөрэҕин кыһаларыттан, үлэ кэлэктииптэриттэн, чугастааҕы улуустартан 58 хамаанда кытынна. Түмүк оонньуулар ааспыт субуоталаах өрөбүлгэ “Кыайыы 50 сыла” Спорт дыбарыаһыгар буоллулар.
Эр дьоҥҥо “А” бөлөххө түөрт хамаанда – “Сбербанк”, “Аргыс”, “Сэргэлээх” уонна Чурапчы – кыайыылааҕы быһаарыста. Манна “Сбербанк” “Сэргэлээҕи”, оттон “Аргыс” чурапчылары кыайдылар. Түмүк оонньууга “Сбербанк” “аргыстары” хотто. Үһүс бириистээх миэстэни чурапчылар ыллылар.
“В” бөлөххө ДЮСШ (Нам) бастакы, “Эрэл” – иккис, ДьПК – үһүс миэстэлэргэ таҕыстылар.
Дьахталларга “А” бөлөххө “Сбербанк” уонна “Сэргэлээх” икки ардыларыгар сытыы киирсиигэ биэс партия түмүгүнэн “сбербаннар” кыайыылаах таҕыстылар. “Мэрия” хамаанда үһүс буолла.
“В” бөлөххө “Сбербанк-1”, Уус Алдан, ДьПК волейболистара бириистээх миэстэлэргэ таҕыстылар.
Бастыҥ оонньооччулар — Елена Лугинова («Мэрия), Светлана Муратова, Алена Колотова, Юлия Садовникова, Александр Ларионов, Сергей Ковальчук (бары — «Сбербанк»), Ольга Макарова («Сэргэлээх»), Елена Сергеева, Елена Иннокентьева (ДьПК), Ульяна Аммосова (Уус Алдан), Валентин Парилов (ДьПК), Сергей Потапов («Эрэл»), Николай Потапов (ДЮСШ-Нам), Геннадий Михайлов (“Аргыс”) уонна Иосиф Лавров (Чурапчы) – анал бириистэринэн бэлиэтэннилэр.
Роман Попов, «Саха сирэ» хаһыат, edersaas.ru
Петр Павлов хаартыскаҕа түһэриитэ.