Сэбиэскэй пионертан “Дьулуурга” диэри биир хардыы

Ааптар: 
Бөлөххө киир:

Ахсынньы 5 күнэ – СӨ оҕо тэрилтэлэрин хамсааһыннарын күнэ. Быйыл тустаах хамсааһын 25 сыллаах бэйэтэ туспа, кыракый үбүлүөйүн, ону тэҥэ Бүтүн Сойуустааҕы пионердар тэрилтэлэрин 95 сылын бэлиэтээтилэр. Тэрээһин үөрүүлээх чааһын Оҕо айымньытын дыбарыаһыгар ыыттылар.

Түөрт чаас арыый иннинэ тиийбитим, муусука ньиргийэн олорор. Эрэпэтииссийэлэнэ сылдьар буоллахтара дуу, дии санаабытым, оҕолор саалаҕа киирэн номнуо ырыалара, флешмобтара ырааппыт эбит.

Үбүлүөйдээх сыл тэрээһинигэр СӨ Ил Дарханын сүбэһитэ, Оҕо тэрилтэтин хамсааһынын сайыннарар Сэбиэт бэрэссэдээтэлин солбуйааччы Туйаара Едисеева, СӨ үөрэҕин уонна наукатын миниистирин солбуйааччы Эдуард Кондратьев, СӨ ыччат уонна дьиэ кэргэн бэлиитикэтин миниистирин солбуйааччы Савва Михайлов, “Дьулуур” оҕо биир сомоҕо хамсааһынын бэрэссэдээтэлэ, “Арассыыйатааҕы үөрэнээччилэр хамсааһыннара” уопсастыбаннай судаарыстыбаннай тэрилтэ Саха сиринээҕи салаатын бэрэссэдээтэлэ Геннадий Охлопков, Саха сирин араас муннуктарыттан кэлбит  500-чэкэ лидер, о.д.а. кытыннылар.

Тэрээһин саҕаланыыта үүнэр көлүөнэҕэ Бүтүн Сойуустааҕы пионердар этэрээттэрин билиһиннэрэр инниттэн, пионердар үҥкүүлэрин көрдөрдүлэр. Хас биирдии улуус уопсастыбаннай холбоһуuf бэйэтин эҕэрдэ нүөмэрин бэлэхтээтэ.

Геннадий Охлопков: “Дьулуур” тэриллибитэ баара-суоҕа түөрт сыл буолла. Ол эрээри, биһиги тэрилтэбит сайдар, кэҥиир. Ити – хас биирдии уопсастыбаннай холбоһук салайааччытын сыралаах үлэтэ, биһиги лидер оҕолорбут былааннара”, — диэн бэлиэтээтэ уонна өрөспүүбүлүкэ салалтатыгар, бырабыытылыстабатыгар, туһааннаах министиэристибэлэргэ махталын биллэрдэ.

Туйаара Едисеева СӨ Ил Дарханын аатыттан бэлиэ күнүнэн эҕэрдэ тиэртэ. “Тус бэйэм октябренок, бүтэһик пионер буола сылдьыбыппынан киэн туттабын. Оччотооҕу үгэс салҕана турарыттан үөрэбин. Эһиги туох баар көҕүлээһиннэргитин өйүүбүт. Оҕо тэрилтэлэрин икки, үс бүк элбэтиэхпитин сөп”, — диэн эттэ.

Оҕо тэрилтэтин хамсааһыннарыгар өрөспүүбүлүкэ салалтата улахан болҕомтотун уурар. Оҕо холбоһуктарыгар Граннары биэрии туһунан Ил Дархан Ыйааҕа тахсыбыта. 10 сыл тухары 98 оҕо холбоһуга ити Граҥҥа тиксибитэ. Туйаара Олеговна октябренок, пионер аатын сүгэ сылдьыбыппыттан дьоллоохпун диэн эттэ. Онтон эһиги бэйэҕит кыаххытын олоххо киллэрэр дьоллооххут”, — диэн Эдуард Кондратьев тоһоҕолоон ыйда.

Оҕону, ыччаты иитиигэ көхтөөх үлэтин, СӨ оҕо тэрилтэтин хамсааһына сайдыытыгар тус кылаатын иһин Оҕолор уопсастыбаннай холбоһуктарын норуоттар икки ардыларынааҕы Сойууһун аатыттан “Оҕо уопсастыбаннай хамсааһынын сайдыытыгар кылаатын иһин” мэтээллэринэн Үөрэҕи сайыннарар уонна квалификацияны үрдэтэр институт дириэктэрэ Галина Алексеева, Ил Түмэн дьокутаата Елена Голоморева наҕараадаланнылар.


Лауреат үрдүк аатын ылбыт Андрей Иванов: “Оҕо тэрилтэтин хамсааһыныгар алта-сэттэ сыл анараа өттүгэр киирбитим. Маҥнай бэйэбит кыра сүһүөх “ДИМСИ” холбоһукпутуттан саҕалаабытым, онтон өрөспүүбүлүкэ таһымыгар тахсыбытым. 2013 сыллаахха “Дьулуур” оҕо биир сомоҕо хамсааһына тэриллибитэ. Көхтөөх киһи оҕолору түмэр, кинилэргэ уонна салайааччыга араас тэрээһиннэри, куонкурустары ыытарга көмөлөһөр эбээһинэстээх. Үөрэхпэр бириэмэ тиийэр. Тоҕо диэтэххэ, көхтөөх киһи бары өттүнэн сайдыылаах. Мин көхтөөх кыттааччыбын, онон үөрэхпэр бириэмэ тиийбэт диэн хаһан даҕаны толкуйдуо суохтаах. Барытын тус бэйэтинэн уонна хамаандатын кытта ситиһиэхтээх, барыларыгар көмөлөһүөхтээх. Эһиил оскуоланы бүтэрээри сылдьабын. Хотугулуу-Илиҥҥи федеральнай университет юридическай бакылтыатыгар туттарсар санаалаахпын.

Лауреат буоллуҥ диэн сэрэппэтэхтэрэ, көннөрү эрдэ барарыҥ табыллыбат диэн эрэ эппиттэрэ. Доҕотторбун кытта тэрээһиҥҥэ кытта диэн кэлбиппит. Ыҥырбыттарыгар олус соһуйдум. Саала саамай уһук эрээтиттэн сүүрэн түстүм”, —  диэн үөрүүтүн үллэстэр.

Оҕолор эчи көхтөөхтөрүн, эчи кыраһыабайдарын. Бары биир киһи курдук хас биирдии улуус, хамаанда нүөмэрин уруйдуу-айхаллыы көрсөллөр, эмиэ соннук ытыс тыаһын доҕуһуолунан сыанаттан атаараллар. Олохторуттан ойон туран тэбис-тэҥҥэ ыллаһаллар, тэбис тэҥҥэ үҥкүүлэһэллэр. Тэрээһин даҕаны эмиэ ол курдук көрүөх бэтэрээ өттүгэр биир тыынынан ааста.

Быйылгы үбүлүөйдээх сыл лауреаттара:

  1. Софья Копылова, “Пятая высота” оҕо уопсастыбаннай тэрилтэтин көхтөөх кыттааччыта, Дьокуускай куорат 5-с №-дээх оскуолатын 11-с кылааһын үөрэнээччитэ.
  2. Эльмира Аллероева, “Орбита” оҕо уопсастыбаннай түмсүүтүн лидерэ, Жатайдааҕы 2-с №-дээх оскуола 11-с кылааһын үөрэнээччитэ.
  3. Андрей Иванов, “Оҕо уонна ыччат социальнай көҕүлээһинэ” оҕо уопсастыбаннай холбоһугун лидерэ, Дьокуускай куорат 7-с №-дээх оскуолатын 11-с кылааһын үөрэнээччитэ.
  4. Маргарита Рахматуллина, “Хадаар кэскилэ” оҕо уопсастыбаннай тэрилтэ лидэрэ, Чурапчы улууһун Хадаар оскуолатын 10-с кылааһын үөрэнээччитэ.
  5. “Ылдьаа ыччаттара” оҕо уопсастыбаннай тэрилтэ, Нам улууһун Хатыҥ Арыы оскуолата.
  6. “Үрдэл” оҕо уопсастыбаннай холбоһуга, Тааттатааҕы “Сатабыл” оҕо айымньытын дьиэтэ” эбии үөрэхтээһин тэрилтэтэ.
  7. “Содружество” оҕо уопсастыбаннай холбоһугун Сойууһа, Нерюнгритээҕи “Оҕолор айар сайдыыларын киинэ” эбии үөрэхтээһин тэрилтэтэ.
  8. Валентина Иванова, “Здравствуйте” оҕолор педагогическай этээрээттэрин салайааччыта, Дьокуускай куораттааҕы “Оҕо (подростковай) киинэ” эбии үөрэхтээһин тэрилтэтэ.
  9. Айна Попова, “Окрыленные мечтой” оҕо уопсастыбаннай тэрилтэтин салайааччыта, Мэҥэ Хаҥалас улууһун Аллараа Бэстээх оскуолатын дириэктэрин иитэр үлэҕэ солбуйааччыта.
  10. Татьяна Ильина, СӨ пионердарын уонна оҕо тэрилтэтин хамсааһынын бэтэрээнэ, СӨ Ил Дарханыгар Оҕо тэрилтэтин хамсааһынын сайыннарар Сэбиэтин чилиэнэ, СӨ үөрэҕин үтүөлээх үлэһитэ.

Людмила ПОПОВА, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0