Соторутааҕыта Арчы дьиэтигэр Саха Өрөспүүбүлүкэтин култууратын туйгуна, ССРС народнай артыыһа К. Базарсадаев аатынан аан дойдутааҕы бас куоластар куонкурустарын лауреата, Суорун Омоллоон аатынан Опера уонна балет тыйаатырын элбэҕи эрэннэрэр солиһа Егор Колодезников айар үлэтин 10 сылыгар аналлаах «Дьоннорбун үөрүүнэн көрсөммүн» кэнсиэрэ буолла.
Бу күн ырыаһыты истиҥник эҕэрдэлии Россия, Саха Өрөспүүбүлүкэтин норуодунай артыыһа, П.А. Ойуунускай аатынан бириэмийэ, Ф.И. Шаляпин аатынан куонкурус I степеннээх лауреаттара, саха норуотун киэн туттуута, Россия бастыҥ баһа Иван Степанов, СӨ үтүөлээх артыыската, АГИКИ уонна М.Н. Жирков аатынан музыкальнай колледж вокалга кафедратын профессора, эдьиийэ Валентина Ивановна Колодезникова, СӨ үтүөлээх бырааһа, үтүөлээх артыыска Анна Ивановна Егорова уонна буойун — поэт Макар Хара соҕотох кыыстара Земфира Макаровна Кузьмина, СӨ үтүөлээх артыыһа С.И. Емельянов уо.д.а элбэх көрөөччүлэр, аймах-билэ дьон, ыалдьыттар, ырыаһыт талаанын сэргээччилэр кэлбиттэр. Көрсүһүү-кэнсиэри СӨ үөрэҕириитин туйгуна Вера Гоголева иилээн-саҕалаан ыытта.
Егор Колодезников оҕо сааһа, оскуолатааҕы кэмнэрэ кэрэ-мааны айылҕалаах,хатыҥ чараҥ алардаах Томпо улууһун Мэҥэ-Алданыгар ааспыта. Төрөппүттэрэ ытыктанар дьон. Аҕата Петр Петрович айылҕаттан айдарыылаах, талааннаах баянист, СӨ култууратын туйгуна, мелодист, Мэҥэ-Алданнааҕы оҕо музыкальнай оскуолатын дириэктэрэ, оҕо – аймах убаастыыр учуутала. Оҕолор музыка кэрэ эйгэтигэр иитиллибиттэрэ.
Бу киэһэни Егор убайа, СӨ култууратын туйгуна, Табаҕа оҕо музыкальнай оскуолатын дириэктэрэ, СӨ баянистарын курэхтэһиитин лауреата Михаил Петрович Колодезников уонна Егор кэргэнэ, СӨ култууратын туйгуна, Аан дойдутааҕы куонкурустар лауреаттара, пианистка Наталья Шадрина фортепианоҕа доҕоһуоллаатылар.
Бу дьоро күн дьиэ кэргэн киэһэтэ буолла: кыра Күннэй Колодезниковаттан саҕалаан, профессионал пианистка, баянист доҕуһуоллара, абаҕата СӨ үөрэҕириитин сайыннарар институт доцена, мелодист Анатолий Петрович Колодезников «Төлөн» диэн бэтэрээннэргэ анаммыт ырыатын, Мэҥэ-Алдантан норуоттар икки ардыларынааҕы, өрөспүүбүлүкэтээҕи куонкурустар лауреаттара «Чараҥ» вокальнай ансаамбыл киэргэттилэр.
Ырыаһыт Егор Колодезников 25 операҕа сүрүн партиялары толорон кэллэ. Ол иһигэр «Дьулуруйар Ньургун Боотур», Мельник «Русалка», Евгений Онегин, хан Кончак “Князь Игорь», Король Рене «Иоланта», Лепорелло «Дон Жуан» уо.д.а.
Егор кыра эрдэҕиттэн үлэҕэ эриллибит буолан ыарахаттары тулуйар, туруоруммут сыалын хайаан да тиһэҕэр тириэрдэр үтүө хаачыстыбалаах, күүстээх санаалаах, инникигэ эрэллээх киһи. Көрөөччүлэр ырыаһыт модун куолаһын, ыраас сэбэрэтин, лоп — бааччы бэйэтин сөҕө махтайа иһиттилэр, үөрэ-долгуйа көрдүлэр: бас куоластаах Иван Степановпытын солбуйуох киһилэммиппит диэн эрэх-турах сананнылар. Аҕа табаарыс, доҕор быһыытынан Иван Прокопьевич биир идэлээҕэр Егор Колодезниковка кэс тылын, баҕа санаатын тиэртэ, үтүөнү баҕарда.
Егор биллиилээх опералартан, ариялара, саха мелодистарын чулуу ырыаларын толоруута дьон дууһатыгар умнуллубаттык иҥэн хаалла.
Кэнсиэр көрө олорон билэр оҕоҕунан астыныы-дуоһуйуу, киэн-туттуу дууһаҕын үөрдэр, сылаанньытар, хаһааҥҥыта эрэ кырачаан киһиҥ ситэн-хотон турбута астыннарар, долгутар.
Ол эрээри, дууһам этэринэн, бу эдэр, элбэҕи эрэннэрэр талааннаах ырыаһыппытын дьиҥ-чахчы өйүүллэрэ буоллар, диэн опера тыйаатырын салалтатыгар тиэрдиэҕи баҕарыллар.
Сэдэх талааны чочуйан, киэҥ сирдэринэн үөрэттэрэн, аан дойду аатырбыт ырыаһыттарын кытта такайан, үрдүк чыпчаалга таһаарыы – төрөөбүт өрөспүүбүлүкэбит, норуоппут иннигэр ытык иэс буолар дии саныыбын. Талааннаах ыччаттарбытыгар биһирэбил, өйөбүл хайаан да наада!
Мохсоҕол кыыллыы, хомпоруун хотойдуу үрдүккэ-сырдыкка күһүгүрээ, талааннаах ыччаппыт! Киэҥ нэлэмэн Сахаҥ сирин халлаанын анныгар, Россия эбэҥ үрдүнэн модун куолаһыҥ эҥсилиннин!
Зоя Чирикова,
“СӨ култууратын сайдыытыгар кылаатын иһин” бэлиэ хаһаайката, Томпо улууһун Мэҥэ-Алдан нэһилиэгин Бочуоттаах олохтооҕо, РФ билии уопсастыбатын “Тыл маастара” бэлиэтин хаһаайката, педагогическай үлэ бэтэрээнэ.