Дьокуускай куоракка биир киһи гарааһыттан сэлии кыыл аһыыларын уорбуттарын туһунан полицияҕа үҥсүбүт. Барыта 4,5 мөл. солк.суумалаах хоромньу тахсыбыт.
Киин куорат оперативниктара бу уорууга уорбалаан, урут сууттана сылдьыбатах 20, 22 уонна 25 саастаах уолаттары туппуттарын туһунан РФ ИДьМ-тын официальнай бэрэстэбиитэлэ Ирина Волк иһитиннэрдэ.
Барыллаан быһаарыынан, бу киһи сэлии кыыл аһыыларын атыылыыр туһунан биллэриитин ааҕаннар, атыылаһааччы быһыытынан киниэхэ тиийбиттэр. Онтон ол кэнниттэн аҕыйах хонук буолан баран, түүн тиийэн, гараастан уорбуттар уонна куорат таһыгар, чааһынай дьиэҕэ илдьэн кистээбиттэр.
Бу уолаттар өссө биир итинник буруйу оҥорууга эмиэ уорбаланаллар — алтынньыга 21 сэлии аһыытын уоран, 6,5 мөл. солк. тахса суумалаах хоромньуну оҥорбуттар. Ол барыта былдьанна.
СӨ ИДьМ-тын Силиэстийэлиир управлениета бу чахчынан «Уоруу» ыстатыйа 4-с чааһынан холуобунай дьыала тэрийдэ. Силиэстийэ хадатаайыстыбатынан, уорбаланааччылар Силиэстийэлиир изоляторга хаайылыннылар.
Вера МАКАРОВА, edersaas.ru