Улахан дьон сэлликтэн хайдах харыстанарыгар туһалаах сүбэни-аманы СӨ Доруобуйа харыстабылын министиэристибэтин кылаабынай эпидемиолога Дария Адамова биэрдэ.
Надежда ЕГОРОВА, «Саха сирэ» хаһыат, edersaas.ru
Сэллигинэн ким баҕарар ыалдьыан сөп. Онуоха стресс, санаа-оноо тууйуллуута, үлэҕэ сылайыы, арыгыны сиэри таһынан иһии, табаҕы тардыы, иҥэмтиэтэ суох мөлтөх аһылык, нэһилиэнньэ биир сиргэ симсэн олоруута уонна ыалдьар дьону кытары элбэхтик алтыһыы тириэрдиэхтэрин сөп.
Ол эбэтэр, сэллигинэн ыалдьыбыт киһи эн таскар ханна баҕарар: тырааныспарга, элбэх кыбартыыралаах дьиэҕэ киирэр ааннарга, поликлиникаларга уо.д.а. сылдьыан сөп.
Харыстанар ньымалар:
Сэллиги эрдэттэн быһаарар туһуттан сыл аайы доруобуйаны көрдөрүнэр, диспансеризацияҕа сылдьар ордук. Сылга биирдэ хайаан да флюорографияҕа түһэр наада. Доруобуйаны куруук кэтэнэн көрө сылдьар бэйэҕэр туһалаах буолуо.
Ону таһынан элбэхтик сибиэһэй салгыҥҥа, күҥҥэ сылдьыллыахтаах. Битэмииннэри иһии бэйэҕит уонна оҕолоргут доруобуйатын бөҕөргөтөр.
Улахан оруолу тус гигиенаны тутуһуу эмиэ ылар. Ол курдук, илиини сууна сылдьыахха, санитарнай-гигиеническэй ирдэбиллэри тутуһуохха наада.
Хомойуох иһин, сэллик үгүс бэлиэлэрэ оннук ала-чуо уратыта суохтар. Арай, маннык сибикилэр баар буоллахтарына, уорбалыахха сөп.
– Сөтөлүҥ силлээх эбэтэр хааннаах буолар;
– Түргэнник сылайаҕын уонна этиҥ-сииниҥ илистэр;
— Аһыах-сиэх санааҥ кэлбэт, ыйааһыныҥ түһэр.
– Көлөһүнүҥ аһара тахсар, түүн эмиэ көлөһүннэнэҕин.
– Кыраадыһыҥ 37-37,5 буолар.
Бу сибикилэр үс нэдиэлэ устата ааспатахтарына, суһаллык терапевт-бырааска көрдөрүнүөххэ наада.
Доруобай буолуҥ!
Надежда ЕГОРОВА, «Саха сирэ» хаһыат, edersaas.ru