Саха норуодунай бэйиэтэ Семен Данилов төрөөбүтэ 100 сылын көрсө өрөспүүбүлүкэ, Арассыыйа таһымнаах үгүс ахсааннаах тэрээһиннэр сылы быһа ыытыллаллара былааннанар.
Надежда ЕГОРОВА, «Саха сирэ» хаһыат, https://edersaas.ru/
Олортон биирдэстэринэн «Киһиэхэ — төрөөбүт дойдута» ааҕыы уонна ырыа өрөспүүбүлүкэтээҕи I күрэстэһиитэ буолар.
Аан бастаан ыытыллар маннык дьаһалы СӨ култуура уонна духуобунай сайдыы министиэристибэ, Өксөкүлээх Өлөксөй аатынан Норуоттар доҕордоһууларын дьиэтэ уонна Горнай улууһун дьаһалтата тэрийэллэр.
Күрэс сыалынан-соругунан бэйиэт Саха сирин кэскилин туһугар анаабыт олоҕун, киэҥ көрүүлээх санааларын, эппит тылларын сүмэтин үйэтитии уо.д.а. буолар.
«Ырыа — сүрэх төлөнө, ырыа — санаа көҥүлэ» ырыа куонкуруһугар С.Данилов хоһоонноругар урут суруллубут уонна эдэр ааптардар айбыт саҥа ырыаларынан кыттыахтара.
“Дьиҥнээх поэзия – өрүү дууһа муусуката, сүрэх ырыата» ааҕыы күрэстэһиитигэр ааптар хоһооннорун уонна киниэхэ анаан айыллыбыт хоһооннору ааҕыахтара.
Түмүккэ Гран-при уонна лауреаттар, дипломаннар, номинаннар быһаарыллыахтара.
Өрөспүүбүлүкэтээҕи күрэс кыайыылаахтарыттан таҥыллыбыт нүөмэрдэринэн «Киһиэхэ — төрөөбүт дойдута» түмүктүүр гала-кэнсиэр буолуоҕа.
ЫСПЫРААПКА:
Семен Петрович Данилов — саха норуодунай бэйиэтэ, РСФСР Суруйааччыларын сойууһун чилиэнэ, М.Горькай уонна П.Ойуунускай ааттарынан Судаарыстыбаннай бириэмийэлэр лауреаттара, Польша Норуодунай Өрөспүүбүлүкэтин култууратын үтүөлээх диэйэтэлэ, биллэр уопсастыбаннай диэйэтэл, өр сылларга Саха сирин Суруйааччыларын сойууһун бэрэссэдээтэлэ.
Төрөөбүт норуотун духуобунай сайдыытыгар дьоһуннаах кылааты киллэрбит, бар дьонун тапталын, ытыктабылын ылбыт бэйиэт 100 сааһын көрсө төрөөбүт төрүт дойдутугар – Горнай улууһугар Семен Данилов сыла биллэрилиннэ.
Надежда ЕГОРОВА, «Саха сирэ» хаһыат, https://edersaas.ru/