Ыам ыйын 2—7 күннэригэр Сербия Нови-Сад куоратыгар көҥүл уонна классическай тустууга Европа чөмпүйэнээтэ ыытыллар.
Роман ПОПОВ, «Саха сирэ» хаһыат, edersaas.ru
Бу улахан түһүлгэҕэ саха тустууга оскуолатын соҕотох иитиллээччитэ, Македония аатыттан тустан эрэр Владимир Егоровпыт бастакы хапсыһыытыгар Арассыыйа бөҕөһүгэр, “Иван Ярыгин-2017” турнир кыайыылааҕар Заур Угуевка сабырыйтаран, күрэхтэһииттэн туораата. Владимир көрсүһүү тиһэх мүнүүтэтигэр диэри 5:0 ахсаанынан хотторон иһэн, утарылаһааччытын көбүөр таһыгар үтэн таһааран, онно эбии көҕө суох тустарын иһин икки очукуону бэрдэрэн ахсааны 5:3 оҥордо.
Салгыы финал аҥаарыгар Угуев чөмпүйүөн буолбут Георгий Эдишерашвилигэ (Азербайджан) 1:5 ахсаанынан хотторон үһүс миэстэни ылла.
Владимир Егоров Македония былааҕын аннынан тустубут бу иккис улахан түһүлгэтэ. Болгарияҕа буолбут “Дан Колов” турнирга эмиэ бастакы эргииртэн туораан хаалбыта. Мантан антах уолбут илиитэ-атаҕа үөрэннэҕинэ, сыыйа-баайа омук көбүөрдэригэр тустан барыа, биир дойдулаахтарын үөрдүө диэн эрэнэбит.
Роман ПОПОВ, «Саха сирэ» хаһыат, edersaas.ru