close
Сэтинньигэ эйигин туох күүтэрий? (САХАЛЫЫ ГОРОСКОП)...
· - Бу - интэриэһинэй - Олох-дьаһах

Сэтинньигэ эйигин туох күүтэрий? (САХАЛЫЫ ГОРОСКОП)

Хой. Ый бастакы аҥаарыгар доруобуйаҕын күүскэ көрүн. Иккис аҥаарыгар харчыгын үчүгэйдик ууруна сырыт. Ыһыма-тоҕума, иэс биэримэ, таптаабыккын, талбыккын атыылаһыма. Тугу барытын чугас дьоҥҥун кытта сүбэлэһэн баран быһаарыыта ылын. Үлэҕэр салалтаҕын кытары мөккүһүмэ. Сотору үп-харчы тутуоҥ. Бу ыйга эйиэхэ 2, 8, 20, 30 күннэр ордук көмөлөһүөхтэрэ.

Оҕус. Үлэҕэр эбии харчылаһар кыахтаныаҥ. Сынньалаҥҥын чугас дьоҥҥун кытары атаар. Аҕам саастаах аймахтаргын кытары көрсөргүн, кэпсэтэргин умнума. Эн эрэммэккиттэн сылтахтанан, тапталлааххын кытары улаханнык иирсиэххин сөп. Ол бэрт өргө диэри соһуллуо. Ис туруккар уонна тас көрүҥҥэр болҕомтоҕун уур. 2, 6, 10, 15, 29 чыыһылалар эйиэхэ туһалыахтара.

Игирэлэр. Ый иккис аҥаарыгар түбүгүрүөҥ-садьыгырыаҥ. Онно элбэх харчыны барыырга тиэтэйимэ. Урукку доҕоргун соһуччу көрсүөҥ. Таптал иэйиитигэр куустарбытыҥ да иһин, доруобуйаҕын умнума. Хаамыынан дьарыктаныыҥ, йога эйиэхэ ордук көдьүүстээх, туһалаах буолуохтара.  Бу күннэргэ ыраах барартан туттунарыҥ ордук. 8, 13, 18, 25, 29 чыыһылалар табыгастаахтар.

Араак. Дьыалабыай кэпсэтии, саҥаны саҕалааһын табыллыа. Ол да буоллар, доруобуйаҕын умнума. Сибиэһэй салгыҥҥа сырыт, спордунан дьарыктан. Үп-харчы үчүгэй. Чугас дьонуҥ, доҕотторун эйиэхэ сүбэлэрин болҕомтоҕор ыл. Ыраахтан үчүгэй сонуну истиэҥ. Ол санааҕын көтөҕүө, үлэлиир, айар-тутар баҕаҕын күүһүрдүө. 2, 6, 10, 15, 20 күннэргэ табыллыаҥ.

Хахай. Ый саҕаланыыта туппутуҥ тупсан, талбытыҥ табыллан иһиэ. Сорудаҕы хойутатыма. Кэллиэгэлэргин кытары элбэхтэ алтыс, кинилэр санааларын иһит. Эйигин сөбүлүүр киһи бэлэх оҥорон үөрдүө. Физкультуранан дьарыктаныыҥ туһалыа. Өрөбүллэргин чугас дьоҥҥун кытары атаар. Чугас дьонуҥ эн болҕомтоҕор наадыйалларын умнума. 5, 9, 13, 19, 29 күннэр көмөлөөх буолуохтара.

Кыыс. Ый бастакы аҥаара чугас дьоҥҥун, аймахтаргын кытары сыһыаны тупсарарга тоҕоостоох. Оттон ый бүтүүтэ суолга сэрэхтээх буол, доруобуйаҕын көрүн. Сулустар тымныйартан сэрэнэргэр сүбэлииллэр. Бу күннэргэ истиҥ көрсүһүүгэ ыҥырыллыаҥ. Онно бэлэх, кэһии тутан үөрүөҥ. Ис санааҕын, түүлгүн  ыһа-тоҕо кэпсээмэ. 6, 12, 16, 20, 29 күннэр эйиэхэ чугастар.

Ыйааһын. Сэрэйэн көрөр дьоҕуруҥ күүһүрүө. Кэллиэгэлэргин кытары уопсай тылы буларга кыһалын. Интэриэһинэй билсиһии күүтэр. Үп-харчы боппуруоһа куһаҕана суох. Айан, сонун сиргэ сылдьыы, дьону-сэргэни кытта алтыһыы бэйэҕэр туһалаах буолуоҕа. Дьиэҕэр наадалаах мал-сал ылбытыҥ өр сулууспалыа. 9, 14, 18, 26 чыыһылалар эйиэхэ ордук чугаһыыллар.

Скорпион. Түргэн-тарҕан буоллаххына элбэҕи ситиһиэҥ. Соҕотох сылдьааччылары интэриэһинэй билсиһии күүтэр. Харчы боппуруоһуттан сылтаан, салалтаҕын кытары тыл-тылга киирсимиэххин сөп. Өрөбүллэргин чугас дьоҥҥор анаа, айылҕаҕа бииргэ сылдьыҥ, сибиэһэй салгынынан тыыныҥ, киинэҕэ барыҥ.  Чугас дьоҥҥор бэлэх оҥордоххуна, кинилэр махталлара эйиэхэ күүс-уох биэриэ. 3, 17, 20, 27 күннэр эн диэки хайыһаллар.

Охчут. Элбэх сорудахтан сылайыаҥ. Ол да буоллар көхтөөх, түргэн буоларга кыһалын. Оччоҕуна дуоһунаһыҥ үрдүө, хамнаһыҥ улаатыа, бириэмийэ да тутуоҥ. Ыраахтан үчүгэй сонуну истиэҥ. Тус бэйэҕэр саҥа таҥас-сап атыылаһыыҥ олоххор үчүгэй өртүгэр уларыйыыны киллэриэ.  Соһуччу көрсүһүүттэн улаханнык долгуйуоҥ, үөрүөҥ.  2, 3, 29, 30 күннэр эйиэхэ көмөлөһүөхтэрэ.

Чубуку. Сөбүлэһии түһэрсэргэ, дьыалабыай кэпсэтиини ыытарга табыллар кэмиҥ. Ол эрээри, сурахтан-садьыктан сэрэн. Ону-маны мээнэ сэлэһимэ, истибиккин да кэпсээмэ. Спордунан дьарыктаныыҥ доруобуйаҕар туһалыа. Ыраахтан ыалдьыттар кэлиэхтэрэ эбэтэр кэһии тутуоҥ. Түүлгэр болҕомтоҕун уур. Чугас дьонуҥ сүбэлэрэ эйиэхэ туһалаах буолуоҕа. 10, 15, 22 күннэр үчүгэйдэр.

Күрүлгэн. Бу ыйга элбэхтик айанныаҥ. Салалтаҥ да олус элбэх сорудаҕы биэриэ. Ону тулуйарыҥ, кэмигэр толороруҥ наада. Доруобуйаҕын көрүн, массаажка сырыт. Оччоҕо күүһүҥ-уоҕуҥ бараныа суоҕа.  Дьон-сэргэ тугу этэрин өйдөөн иһит, ырыҥалаан көр. Урууларгыттан-аймахтаргыттан үөрүүлээх сонун истиэҥ. Урукку доҕоргун, табаарыскын соһуччу көрсө түһүөҥ. 3, 9, 15, 29 чыыһылалар бу ыйга эйиэхэ чугастар.

Балык. Ый иккис аҥаарыгар түбүгүрүөҥ, айанныаҥ. Ол барыта ситиһиилэри аҕалыа. Ол гынан баран, аҥардас үлэҕинэн үлүһүйүмэ. Тапталлааххар болҕомтоҕун уур. Чугас дьонуҥ этэллэрин иһит, ылын. Дьиэҕэр наадалаах, туһалаах мал-сал атыыласпытыҥ өр сулууспалыа. Имиджкин уларыттаххына, тус олоххор соһуччу сонун сүүрээн киириэ. Бириэмийэ эбэтэр хамнас үрдээһинэ күүтэр. 7, 17, 19, 28 чыыһылалар көмөлөөх буолуохтара.

 

 

#бүгүн: 9
2
1

Сайт матырыйаалларын ааптар көҥүлэ суох ылар бобуллар.