Саха сиригэр арыгы атыытыттан аккаастанан, чөл олоҕу тутуһар нэһилиэк ахсаана элбээн иһэр. Сэтинньи 22 күнүгэр Ил Түмэн дьокутааттара өссө сэттэ нэһилиэги бигэргэттилэр.
Ол курдук, Өлүөхүмэ улууһун Хоро уонна Балаҕаннаах, Амма улууһун Өнньүөс, Бүлүү улууһун Чинэкэ, Ньурба улууһун Чуукаар, Таатта улууһун Томтор, Ньурба улууһун Күндээдэ нэһилиэктэригэр арыгы атыыта бобулунна.
Онон билигин өрөспүүбүлүкэ 153 нэһилиэгэр арыгы атыыламмат. Саамай элбэх чөл олох тирэх кииннээх улуустарынан Нам, Үөһээ Бүлүү, Мэҥэ Хаҥалас, Хаҥалас буолаллар. Арыгы атыыламмат бөһүөлэктэригэр буруйу оҥоруу аҕыйаабыта, төрөөһүн өлүүнү куоһарбыта, дьон доруобуйата тупсан, култуурунай, спортивнай сынньалаҥҥа талаһар буолбуттара бэлиэтэнэр.
Ангелина ВАСИЛЬЕВА, “Саха сирэ” хаһыат, edersaas.ru