Бүгүн Өлүөхүмэ оройуонун Улахан Муҥку нэһилиэгэр элбэх оҕолоох Анна уонна Петр Саввиновтар 7-с оҕоломмуттарынан, биир дойдулаахтара умнуллубат бырааһынньыктааҕы дьоро күнү тэрийдилэр.
edersaas.ru
Саввиновтар улахан уоллара Василий Томскай куораттааҕы суол-тырааныспар техникумугар үөрэнэр. 9-с кылааска үөрэнэр Павел күрэхтэһиигэ сылдьар. Онон улахан уолаттар бу дьоро күҥҥэ кыттыыны ылбатылар.Оттон 5-с кылаас үөрэнээччитэ Давид уонна 2-с кылааска үөрэнэр Злата, биир саастаах Захар балтыларын бастакы үөрүүлээх бырааһынньыгын төрөппүттэрин кытта бэлиэтээтилэр. Күн сирин көрбүт кыысчааны төрөппүттэрэ Виола диэн ааттаатылар. Үөрүүлээх быһыыга-майгыга Улахан Муҥку саҥа олохтооҕун төрөппүттэригэр нэһилиэк дьаһалтата төрөөбүтүн туһунан сибидиэлистибэ туттарда. Оччугуйкаан киһи олоҕор бастакы докумуонун туттарыы таһынан, оройуоннааҕы култуура, ыччат, дьиэ кэргэн уонна спорт управлениеларын салайааччылара, оройуоннааҕы дьахтар сэбиэтин уонна «Арассыыйа ийэлэрэ» улуустааҕы салаатын бэрэссэдээтэллэрэ эҕэрдэ тыл этэн туран, Саввиновтар дьиэ кэргэннэригэр олус наадалаах бэлэҕи биэрдилэр.
Бу туһунан улуустааҕы Дьахтар сэбиэтин бэрэссэдээтэлэ Анна Сафонова кэпсээтэ.
Елена ПОТОЦКАЯ, «Саха сирэ» хаһыат, edersaas.ru