Аҕыйах хонуктааҕыта тутуу үлэҕэ киириитин болдьоҕун уһатар хампаанньалар испииһэктэрин таһаарбыппыт. Бу сырыыга кыттыгас тутууга улахан кыһалҕаҕа ыктарбыт тутааччыллар тустарынан сырдатыахпыт.
Анивера АКИМОВА, «Саха сирэ» хаһыат, edersaas.ru
Билигин кыттыһан элбэх кыбартыыралаах дьиэни тутуунан (долевое строительство) элбэх киһи туһанар буолла. Бастатан туран, бу дохуота кыра, тута улахан сууманы ууран биэрэр кыаҕа суох дьоҥҥо олус наадалаах. Киһи эрэ барыта 3 – 4 мөлүйүөн солк. кыайан биирдэ ууран биэрбэт. Иккиһинэн, ырыынакка олохтоммут сыанаттан квадратнай миэтэрэ сыаната арыый намыһах буолар. Ол эрээри кыттыгас аата кыттыгас. Ким эрэ харчытын биэрэн быстыбат, күүттэрэр-кэтэһиннэрэр. Онон, кыттыгас тутуу соһулла сылдьар адаҕаҕа кубулуйда.
Хас даҕаны сылы быһа соһуллубут, кыайан үлэҕэ киирбэтэх, кыһалҕалаах эбийиэктэри хонтуруоллуур соруктаах СӨ Архитектуратын уонна тутуутун министиэристибэтин иһинэн анал хамыыһыйа үлэтин саҕалаата. Хамыыһыйаҕа «СӨ судаарыстыбаннай сакаасчытын сулууспата» ГКУ, СӨ тутуутун уонна дьиэни-уоту кэтээһиҥҥэ судаарыстыбаннай управлениетын бэрэстэбиитэллэрэ киирдилэр.Кыттыгас тутууну министиэристибэ бэйэтин хонтуруолугар ылыаҕа.
СӨ тутуутун уонна дьиэни-уоту кэтээһиҥҥэ судаарыстыбаннай управлениетын тохсунньу 20 күнүнээҕи чахчыларынан, кыттыһан тутуу кыһалҕаҕа ыктарбыт эбийиэктэрэ манныктар:
Бастакытынан, «Сирстрой» ИСК ХЭУо Дьокуускай куорат 67-с кыбартаалыгар тутулла турар 9 мэндиэмэннээх олорор дьиэ;
Иккиһинэн, «Теплосервис» ХЭУо Покровскайдыыр суол 7-с килэмиэтиригэр баар 24 уонна 20 кыбартыыралаах дьиэлэр;
Үсүһүнэн, «Стерх» ЖСПК Дьокуускайга Пекарскай уулуссатын 6 нүөмэригэр тута турар 27 кыбартыыралаах дьиэтэ;
Төрдүһүнэн, «Макрос» ХЭУо Чурапчы сэлиэнньэтигэр түөртүү кыбартыыралаах тоҕус дьиэтэ;
Бэсиһинэн, «Северная строительная компания» ХЭУо 69 кыбартаалга Каландрашвили уулуссатыгар тутулла турар 9 мэндиэмэннээх дьиэтэ (бастакы уочарата) киирдэ.
Анивера АКИМОВА, «Саха сирэ» хаһыат, edersaas.ru