СГТХА устудьуоннара Казахстаҥҥа үөрэниэхтэрэ

Бөлөххө киир:

Саха государственнай тыа хаһаайыстыбатын академията ситиһиилээх устудьуоннары омук сиригэр атастаһыы бырагырааматынан үөрэххэ ыытар. Ол курдук, номнуо тохсунньу ыйга аан маҥнайгыларын Казахстаҥҥа баар Сакен Сейфуллин аатынан Казахскай агротехническэй университекка уон устудьуон бараары сылдьар. Бу күһүн кинилэр Академия иһинэн ыытыллыбыт аһаҕас куоҥкуруска сайаапка биэрэн кыттыбыттара.

Куоҥкуруһу ааспыт устудьуоннар ааттара номнуо биллэн, 2017 сыл тохсунньу ыйга биир семестр устата, ол эбэтэр 5 ыйга, Казахстан университетыгар үөрэнэ барыахтара.

Игнатий Андреев ветеринарнай медицина факультетын 4 кууруһун устудьуона, Ньурба улууһун Хатыҥ-Сыһыы сэлиэнньэтиттэн төрүттээх:

Казахстааҥҥа Астана куоракка барарбыттан олус үөрэ сылдьабын, миигин талыахтара диэн улаханнык эрэммэтэҕим. Тоҕо диэтэххэ академиябытыгар улахан куоҥкурус ааспыта, барыан баҕалаах устудьуон ахсаана элбэх этэ. Үөрэнэ тиийэн баран академиям, дойдум аатын түһэн биэриэм суоҕа диэн эрэнэбин. Атын дойду норуотун культуратын, сиэрин-туомун, итэҕэлин, Казахстааннааҕы аграрнай үрдүк үөрэх үөрэтэр ньыматын, үөрэҕин программатын сиһилии билсиһэн кэлиэхтээхпин, опыт атастаһыахтаахпын диэн сыаллаах-соруктаах баран эрэбин.

Зоя Захарова, ветеринарнай медицина факультетын 4 кууруһун устудьуона, Амма Сатаҕайыттан төрүттээх:

Миэхэ Казахстан устудьуоннарын кытта атастаһан үөрэнэр туһунан факультеппар деканы солбуйааччы Галина Петровна эрийэн биллэрбитэ. Бастаан истэн баран улаханнык итэҕэйбэтэҕим. Докумуон хомуйсуута буолбутугар кэнники, «дьэ кырдьык эбит» диэн долгуйа санаабытым. Билигин биһиги, уон талыллыбыт устудьуон, психологическай трениннарга сырыттыбыт, бэлэмнэннибит. Казахстан агротехническэй университета быдан улахан, элбэх хайысхалаах үөрэх диэн харахпар көстөр. Ол үөрэх кыһатыгар наукаҕа төһө дьарыктаналларын, болҕомто ууралларын көрүөхпүн, билиэхпин наада. Уонна биһиги кэннибититтэн өссө да элбэх устудьуон маннык үөрэнэ барарын баҕарабын.

Гаврил Соловьев, инженернай факультетын 3 кууруһун устудьуона, Нам улууһуттан төрүттээх:

Биһиги академиябыт устудьуоннары атын университекка атастаһан үөрэттэрэ ыытар буолбутун сэҥээрэ, үөрэ истибитим. Тута туох докумуон наадатын, куоҥкурус ирдэбиллэрин ыйыталаһан билэн-көрөн бараммын сайаапка биэрбитим. Куоҥкуруһу ааспыт устудьуоннар билигин номнуо Казахстаҥҥа барарбыт биир эрэ ый хаалла. Бу программанан үөрэнэ барарым миэхэ улахан ситиһиим буолар. Казахстан университетыгар араас омук дойдуларыттан үөрэнэ кэлэллэр. Атын омук дойдутугар биһиги, саха ыччата, этэҥҥэ элбэҕи билэн, саҥаҕа үөрэнэн кэлиэхпит диэн эрэнэбин. Академиябар уонна ректор Иван Слепцовка, биһигини, баҕалаах ыччаты үөрэттэрэ ыытарын иһин махтаныам этэ.

СГТХА уопсастыбаннаһы кытта үлэлиир салаата,

edersaas.ru

+1
0
+1
0
+1
0
+1
0
+1
0
+1
0
+1
0