close
Шанхайга үөрэнэр саха уола Костя
Олох-дьаһах - ЭС - маны аах

Шанхайга үөрэнэр саха уола Костя

Тас дойдуга үөрэнэр саха оҕолоро-2

Сэһэргэһээччибитинэн бу сырыыга Кытай биир улахан куоратыгар үөрэммит уонна билигин онно үлэлии сылдьар Костя ИВАНОВ буолар. Уол бастаан Дзяо Тонг университетын колледжыгар, салгыы Шанхайдааҕы экономика уонна үп университетыгар аан дойду экономиката уонна атыы-эргиэн диэн идэни баһылаабыт. Билигин Костя логистика, реклама уонна тылбаас медиа хампаанньатыгар үлэлиир.

Шанхайы көрөөт да сөбүлээбитим

Онус кылааска үөрэнэ сылдьан бэйэбин боруобалана таарыйа диэн, Шанхайга бара сылдьарга санаммытым. Онно мин оскуолабыттан билэр оҕолорум үөрэнэллэрэ. Куораты көрөөт да сөбүлээбитим: атыы-эргиэн, тутуу сайдыбыт, олох үөһэ күөстүү оргуйара, дьоно-сэргэтэ даҕаны көрсүө-сэмэй этилэр. Ол түгэҥҥэ тута: «Бу сиргэ мин хайаан даҕаны үөрэниэхтээхпин, олорон көрүөхтээхпин», – диэн санаалар күөрэйбиттэрэ.

 

Икки университеты тэҥинэн бүтэрбитим

Уон биирис кылааска үөрэнэ сырыттахпына дьонум: «Биир кэлим эксээмэннэргин үчүгэйдик туттаран, Арассыыйа үрдүк үөрэҕэр киирдэххинэ, биирдэ Кытайга ыытабыт», – диэбиттэрэ. Мин эксээмэннэрбэр омук тылын, обществознаниены таламмын, Хотугулуу-Илиҥҥи федеральнай университет үп-экономика институтугар, ону тэҥэ, Шанхайга Дзяо Тонг университетын колледжыгар киирбитим. Ол саҕана кэтэхтэн үөрэнии суох буолан, Кытайга сылдьаммын, Дьокуускайга кэлэн сессиябын туттарар этим. Онон, университеты тэҥҥэ икки сиргэ бүтэрбитим.

Салгыы магистратураҕа Шанхайдааҕы экономика уонна үп университетыгар аан дойду экономиката уонна атыы-эргиэн диэн идэни баһылаабыт.

Сыаллаах буолуохтааххын

Кытайга үөрэниэн баҕалаах оҕолор, бастатан туран, туох сыаллаах Кытай тылын үөрэтэбиний диэн боппуруоска эппиэттиэхтээхтэр. Элбэх киһи Шанхайга: «Олоххо бэйэбит суолбутун булаары», – диэн сыаллаах-соруктаах айанныыллар уонна кэнникинэн, сыллар-хонуктар аастахтарын аайы, «мунан» киирэн бараллар. Кимнээх эрэ көнөллөр, сорохтор — суох. Улахан куорат олоҕо киһини булкуйар да, таһаарар да күүстээх.

Кытай тыла

Кытайга барыам иннинэ, ол эбэтэр оскуолаҕа үөрэнэ сылдьан, бэйэм балтараа сыл кытай тылын үөрэппитим. Эрдэ үөрэтэ сылдьыбыт тылларбар грамматиката, суруга-бичигэ майгыннаабат буолан, кытай тылын ис туругун, нууччалыы эттэххэ, логикатын билэ сатаабытым. Мин саныахпар, тыл туохтан турарын биллэххинэ, үөрэтэргэ  чэпчэки буолар.

Шаҥхай университеттарыгар граннар

– Шанхай үрдүк үөрэҕин кыһаларыгар ханнык баҕарар идэҕэ үрдүк таһымнаахтык үөрэтэллэр, ол иһин тас дойдулартан тиийэ дьон устудьуоннуу кэлиэхтэрин баҕараллар. Граннар икки көрүҥнээхтэр: куорат уонна дойду киэннэрэ. Сыл ахсын университеттарга көрүллэр граннар миэстэлэрэ уларыйа сылдьар. Холобур, быйыл атыы-эргиэн салаатыгар уон миэстэ баар, оттон кэлэр сылга олох да грант көрүллүмүөҕүн сөп. Ол иһин университеттартан бэйэлэриттэн эрдэ ыйыталаһыахха наада. Үөрэххэ киирэр түгэҥҥэ, бастакы сыл хайаан даҕаны тылы үөрэтии буолар, онон: «Тылы билбэппит», — диэн долгуйуу, куттал суох буолуохтаах.

Иллэҥ кэммэр дьарыктарым

– Оскуола саҕаттан фортепианоҕа, гитараҕа оонньуурбун сөбүлүүбүн. Алта сыл Дьокуускайдааҕы оҕо музыкальнай оскуолатыгар үөрэммитим, ону таһынан, футболунан, баскетболунан дьарыктанабын. Бириэмэ көһүннэ да араас улуу дьон олохторун, сири-дойдуну уларыппыт түбэлтэлэр туһунан кинигэлэри ааҕа сатыыбын. Чөл олоҕу тутуһан, эппин-сииммин эрчийэбин, сүүрэбин, бэлэсипиэт тэбэбин. Шанхайга сылдьан туризмынан, хаартыскаҕа түһэриинэн, видеоҕа устуунан үлүһүйэн киирэн барбытым. Youtube-ка бэйэм ханааллаахпын, онно сиһилии Кытайга олоҕум туһунан араас видеолары устан, таҥан угааччыбын (KonstantinIvanov).

«Бэйэҕитигэр эрэллээх буолуҥ, элбэх мүччүргэннээх сырыыланыҥ уонна дьолгутун дьоннуун үллэстиҥ»

– Ааҕааччыларга баҕарабын түргэнник олоххут сыалын буларгытыгар уонна иннигит диэки эрэллээхтик  баран иһэргитигэр. Хас биирдии хардыыгытын барытын толкуйдаан оҥорорго дьулуһуҥ. Элбэх күүһү-уоҕу солуута суох бараамаҥ, чөл туруктаах буолуҥ. Ааҕааччыларга олохпор элбэхтэ сөбүлээн туттар тылларбын этиэхпин баҕарабын: «Бэйэҕитигэр эрэллээх буолуҥ, элбэх мүччүргэннээх сырыыланыҥ уонна дьолгутун дьоннуун үллэстиҥ».

Чэлгийээнэ Бахсырова, edersaas.ru

#бүгүн: 5
3
0

Сайт матырыйаалларын ааптар көҥүлэ суох ылар бобуллар.

Мин санаам:

4 × пять =