Бүтүн Арассыыйа үрдүнэн дьону арыгыттан, табахтан, о.д.а. наркотиктартан араарар, кэлиҥҥи кэмҥэ саамай биллибит ньыманан Г.А. Шичко ньымата буолар.
edersaas.ru
Бу ньыма сүрүн ис хоһооно, Геннадий Андреевич этэринэн, ханнык баҕарар киһи арыгы туһунан өйдөбүлүн уларытыы буолар. Арассыыйа олохтоохторун баһыйар өттө “арыгы – ас” диэн өйдөбүллээх. Арыгы дьаат буоларын научнай төрүттэргэ олоҕуран дакаастааһыны билсэн, кырдьыктаах информацияны ылбыт киһи бэйэтин олоҕор арыгы оҥорбут содулун, бүтүн уопсастыбаны сутуйарын иһиттэн көрөн, дьиҥнээхтик ис-иһиттэн итэҕэйдэҕинэ, өйө-санаата букатыннаахтык уларыйар.
Шичко ньыматын биир сүрүн ирдэбилинэн, хас биирдии киһи күннүк (дневник) толоруохтаах. Урут сыыһа олоро сылдьыбыт бырагырааматын сөптөөх өйдөбүллэргэ көһөрүү буолар. Куурус хас күнүн ахсын үөрэтээччи уонна истээччи күннүгү анаалыстыыллар, ол түмүгэр истээччи арыгы туһунан сыыһа өйдөбүллэрэ сыыйа киһи төрүөҕүттэн илдьэ сылдьар чөл олоҕор төннүүтэ буолар.
Хомойуох иһин, биһиги уопсастыбабытыгар арыгы хайаан да иһиллиэхтээх диэн бырагыраама наһаа тэнийэн, дьон арыгыттан ылар алдьархайдара сыллата улаатан иһэр. Хотугу эргимтэҕэ олорор дьоҥҥо арыгы атыыта бүтүн норуоту эһэр кутталга тиэрдэн эрэрин исписэлиистэр элбэхтик этэр буоллулар.
Онон, элбэх саханы сиэн эрэр арыгыттан Шичко көдьүүстээх ньымата быыһыан сөп.
Ааҕааччым, саха буолан сандаар, киһи буолан килбэй, арыгыны атыылаһыма, абааһыны аһатыма!
Матвей Лыткин, «Трезвая Якутия» уопсастыбаннай хамсааһын салайааччыта.