Бу соторутааҕыта “Президент Штыров уонна тыа сирэ” диэн прозаик Дмитрий Наумов кинигэтэ таҕыста. Кинигэҕэ ааптар Вячеслав Анатольевич үөлээннээхтэрин, доҕотторун, чугас дьонун, бииргэ үлэлээбит дьонун ахтыыларын, ону сэргэ, интервью быһыытынан сэһэргэһиилэрин түмэн киллэрдэ. Киниэхэ “Саха сирэ” хаһыат суруналыыһа Раиса Сибирякова көмөлөстө. edersaas.ru.
“Дойду үрдүнэн буолбут уларыйыы биир кэрдиис кэмигэр өрөспүүбүлүкэбитин салайбыт Аҕа баһылыкпыт Вячеслав Анатольевич Штыров Саха сиригэр төрөөбүт, харыс халбарыйбакка үлэлээбит, саха дьонун өйүн-санаатын, төрүт үгэһин, олоҕун ытыгылаан иитиллибит нуучча киһитэ. Биһиги, сахалар, ииппит, кинини киһи быһыытынан төрөөбүт буоругар тапталын үргүппэтэх, сойуппатах киһибит. Кини үлэтин-хамнаһын, дойдубут сайдарыгар дьоһун санааларын, олохтоох толкуйдарын сахалыы сырдатарга холоннубут”, — диэн Дмитрий Федосеевич кинигэ киирии тылыгар этэр.
Кинигэҕэ биир түһүмэҕинэн норуодунай поэт Наталья Харлампьева 2013 сыллаахха түмпүт матырыйааллара киирдилэр. Бу суруйуулар нууччалыы тылынан кинигэ буолан тахсыбыттара. “Вячеслав Штыров Саха Өрөспүүбүлүкэтин президенин дуоһунаһыгар 3046 күн үлэлээбитэ. Бу кини олоҕор суолталаах кэм этэ. Кинини бу кэм, бу дуоһунас төһө уйанын-хатанын, төһө далааһыннааҕын, кыахтааҕын, төһө сиэрдээх дьаһаллааҕын тургуппуттара”, — диэн түмүктүүр санааларын Наталья Ивановна.
Дмитрий Наумов бэлиэтээн эппитин курдук, манна үгүс интервью киирдэ. Счетнай Палата аудитора, Мэҥэ Хаҥаласка өр кэмҥэ баһылыктаабыт Владимир Птицын: “Михаил Ефимович муспутун-түмпүтүн Штыров ыспыта диэччилэртэн кэлэйэбин. Сойуус ыһыллыбытын кэнниттэн Россия саҥа сокуона оҥоһулла илигинэ, бары регионнар баһылыктара, ол иһигэр биһиги Михаил Николаевпыт, оччотооҕу президени кытары чугастык сыһыаннаһан, туттумахтаан хааларга дьулуспуттара. Хайа инньэ гымматахха, собчактар, гайдардар, чубайстар туох сокуону айан таһаараллара уонна ол тугунан дьайара биллибэт этэ буоллаҕа. Кэмэ оннуга. Сыыйа Россия оннун-тойун булунан, сокуоннарын кытаатыннаран киирэн барбыта… Быһата, Вячеслав Анатольевич өрөспүүбүлүкэ сайдыытын түстүүр тыын суолталаах боппуруоһу быһаарбыта”, — диэн оччотооҕу кэми ахтан ааһар.
Оттон “Якутцемент” ААУо генеральнай дириэктэрэ, производственник Алиш Мамедов Вячеслав Штыров эпохатын туһунан суруйар. Онно кини Вячеслав Анатольевич промышленнай эйгэҕэ киллэрбит кылаатын, өрөспүүбүлүкэ социальнай-экономическэй сайдыытыгар туһулаабыт үлэлэрин ахтар. Уонна түмүгэр: “Кини биир ураты өрүтүнэн, хамаандатын бырахпата буолар. Киһиэхэ да, бэлиитикэҕэ да бэртээхэй хаачыстыба. Бу иһин ытыктыыбын уонна махтанабын”, — диэн бэлиэтиир.
Аграфена КУЗЬМИНА, “Саха сирэ” хаһыат, edersaas.ru.
