А.Е.Кулаковскай аатынан норуоттар доҕордоһууларын дьиэтэ Уус Алдан улууһун Мүрү нэһилиэгин кытта сибээһи бөҕөргөттүлэр. Үөрүүлээх уонна долгутуулаах түгэн чэрчитинэн, Сөбүлэһии түһэрсилиннэ. Бу туһунан биһиэхэ норуоттар доҕордоһууларын дьиэтин пресс-сулууспата иһитиннэрэр.
Мүрү нэһилиэгин дьаһалтата А.Е.Кулаковскай аатынан норуоттар доҕордоһууларын дьиэтин кытта үлэтин далааһынныыр, сайыннарар соруктаах. Маныаха, бастатан туран, улууска бырааттыы омуктар сыһыаннарын бөҕөргөтөр сыаллаах тэрээһиннэри тиһиктиир, тарбахтарыгар талааннаах уран маастардарын ураты үлэлэрин өрөспүүбүлүкэ таһыгар билиһиннэрэр былааннаахтарын иһитиннэрдилэр.
«2019 сыл биһиги улууспутугар — Дьоруойдар сыллара. Маныаха биһиги улуус аҕыс дьоруойдаахпытынан киэн туттабыт. ССРС Социалистическай Үлэ дьоруойа Данил Бурцев төрөөбүтэ 120, Гражданскай сэрии дьоруойа Хабырылла Дьөгүөрэп — 140, Сэбиэскэй Сойуус дьоруойа Владимир Лонгинов — 100, Арассыыйа дьоруойа Михаил Стрекаловскай — 105 сыллара буолар. Бу далааһыннаах тэрээһиннэри култуура үлэһиттэрэ иилээн-саҕалаан, сүүрэн-көтөн, тэрийэн ыытыахтара. Манна даҕатан эттэхпинэ, кинилэр норуот үгэһин, култууратын көлүөнэттэн көлүөнэҕэ тиэрдэр, сибээстиир, ыччакка иҥэрэр дьоммутунан буолаллар. Сыһыары тутар буоллахха, тиһиктээх үлэ ыытыллар буолан, биһиги уран тарбахтаах уустарбыт, иистэнньэҥнэрбит өрөспүүбүлүкэҕэ бастыҥнарынан биллэллэр«, — диир Мүрү нэһилиэгин баһылыга Василий Борисов.
Норуоттар доҕордоһууларын дьиэтин генеральнай дириэктэрэ Яна Игнатьева бу улуус тарбахтарыгар талааннаах дьоно-сэргэтэ, норуот маастардара тэрийэн ыытар үлэлэрин атыттар холобур оҥостуохтарын сөп диэн этэр. Манна сыһыары тутан, кини уус алданнар уопсастыбаннай түмсүүлэрэ ситиһиилээхтик үлэлииллэрин, 2013 сыллаахха «Мындыр» диэн маастардар уопсастыбаннай түмсүүлэрэ тэриллибитин этэр. Бэлиэтээбиттэринэн, түмсүү 70 чилиэннээх, олор ортолоругар СӨ норуотун 12 маастара, ойуулуур-дьүһүннүүр ускуустубатын 23 маастара, ону сэргэ 34 улуус норуотун маастара бааллар. «Өрөспүүбүлүкэҕэ бастакынан манна «Уус дьиэтэ» тэриллибитэ. Билигин бу дьиэ Бэрт-Ууска, Бээрийэҕэ филиаллардаах. Бырайыак чэрчитинэн 30 киһи үлэлэммитэ. Онон улууһу сайыннарыыга креативнай экэниэмикэ суолтата улахан. Ол курдук, норуот уус-уран оҥоһуктара, уустар, иистэнньэҥнэр үлэлэрэ сайдан, кэҥээн, дьон-сэргэ үлэлэнэрин сэргэ, нэһилиэнньэҕэ дохуоту киллэрэр«, — диир Яна Викторовна.