Өймөкөөн улууһун Төрүтүгэр тулалыыр эйгэни харыстааһын күнүнэн Экология сылыгар анаммыт «Сибэкки баала» буолла.
edersaas.ru
Тэрээһин туһунан быйыл саас Дьахтар сэбиэтин салайааччытынан талыллыбыт Изабелла Кондакова маннык кэпсиир:
— Саас ортолоох дьахталлары көҕүлүүр соруктаах түөлбэлэртэн иккилии дьахтары кытыннарбыппыт. Үөрүөхпүт иннигэр, түөлбэлэрин чиэһин көмүскээн, кыралыын-улаханныын нэһилиэк дьахтара бүтүннүү кытынна.
Биһиги нэһилиэкпит кыра буолан, аймахтар бары түмсэн кэриэтэ түөлбээн олороллор. Ол иһин ким ийэтин, ким эбээтин өйөөн, ыллыыр-ыллаабат, үҥкүүлүүр үҥкүүлээбэт бары кытыннылар.
Биллэн турар, хас биирдии түөлбэ дьахтара: «Биһиги Сибэккибит саамай кыраһыабай», — диэн санаанан кыттааччылары өйөөн, нэһилиэкпит кулууба бу күн самаан сайын кэлбитин биллэ, алаас сибэккинэн симэммит сыһыыттан туох да атына суох буолла.
Куонкурус бары түһүмэхтэрин ситиһиилээхтик ааһан, «Төрүт Сибэкки Куота» бочуоттаах аакка учуутал Надежда Босикова тигистэ.
Бу маннык бырааһынньыктар дьону олус көҕүлүүр, түмэр, сомоҕолуур айылгылаахтар. Батсаап кэмэ буолан, мин бөлөҕүм дьонуттан: «Эһиги туох интэриэһинэй тэрээһиннэри ыытаҕытый?» — диэн ыйыппыппар, сүбэлээбиттэриттэн бу көрүҥү талбытым. Ол ону биһиги бэйэбит ураты тыыннаан, бэртээхэй тэрээһини ыыттыбыт. Баҕар, ким эмэ биһиги холобурбутунан эмиэ маннык биэчэрдэри ыытыаҕа.
Кырдьык, эн күннээҕи олоххун, иллэҥ кэмҥин, бырааһынньыккын бэйэҥ тэрийбэтэххинэ, ким кыһаныай? Онон төрүттэр бэртээхэй холобурдарын дьахтар сэбиэттэрэ уларытан, тупсаран ыытыахтарын сөп. Төрүт нэһилиэгин дьахталларын сэбиэтэ атырдьах ыйыгар «Нэһилиэк бастыҥ тэлгэһэтэ» диэн куонкуруһу биллэрдэ. Онон бу күннэргэ түөлбэлэринэн арассаада атастаһыыта саҕаланна. Ити курдук көхтөөх нэһилиэк олоҕо күөстүү оргуйар.
Елена ПОТОЦКАЯ, «Саха сирэ» хаһыат, https://edersaas.ru