“Килиэп – барыга баһылык” диэн мээнэҕэ этиллибэт, хайа да бэйэлээх киһи килиэбэ суох сатаммат.
Раиса СИБИРЯКОВА, “Саха сирэ” хаһыат, edersaas.ru
Араас чааһынай асчыттар элбээннэр, төһө даҕаны күрэстэһиини үөскэттэллэр, «Дьокуускайдааҕы килиэп комбината» ААУо бэйэтин аналын дьоһуннук толорор. Килиэп-буулка 40, кондитерскай аһылык 100, бирээнньик 19 көрүҥүн астыыр итиэннэ мокоруон уонтан тахса арааһын оҥорор. Күҥҥэ отут туонна бородууксуйаны астаан таһааран, куоракка уонна куорат таһынааҕы бөһүөлэктэргэ баар маҕаһыыннарынан, эргиэн туочукаларынан батарар. Быйыл Дзержинскай аатынан уулуссаҕа комбинат өссө биир фирменнай маҕаһыыны арыйар былааннаах.
Кылаабынай технолог Ирина Фурман бигэргэтэринэн, манна бородууксуйа барыта экологическай өттүнэн ыраас сырьенан оҥоһуллар, киһи доруобуйатыгар буортулаах консерваннар төрүт туттуллубаттар. Комбинакка үлэлиир 600-чэ киһи (технологтар, кондитердар, электриктэр, мэхээнньиктэр, суоппардар о.д.а.) тустаах үлэлэригэр эппиэтинэстээхтик сыһыаннаһаллар, технологическай нуормалары, үлэ гигиенатын итиэннэ үлэҕэ куттал суох буолуутун ирдэбиллэрин тутуһаллар.
Комбинат үс былаһааккалаах. Маҥнайгы былаһааккаҕа мокоруон оҥоһук уонна бирээнньик сыахтара үлэлииллэр, иккискэ килиэп итиэннэ кондитерскай оҥоһук астанар. Үһүс былаһааккаҕа үлэ-хамнас харыыта суох барарын хааччыйар салаалар, тиэйэр-таһар тырааныспар сыаҕа уонна өрөмүөннүүр-тутар учаастак үлэлииллэр.
Таһаарыылаах үлэни-хамнаһы кыаһылыыр кыһалҕалар суох буолбатахтар. Ол – астыыр тэрил эргэриитэ. Ити иһин, ААУо генеральнай дириэктэрэ Денис Белозеров базаны саҥардыыга күүстээх үлэни ыытар. Холобур, 2015-2016 сс. биир сыахха саҥа линия туруоруллубута. Билигин уотунан үлэлиир оһохтору гааска көһөрөргө үлэ ыытыллар. Кэлэр өттүгэр сууйар массыына уонна тута тоҥорор хаамыралар ылыллыахтаахтар.
Соторутааҕыта килиэп комбинатыгар Дьокуускай куорат дьаһалтатын баһылыга Айсен Николаев сылдьан үлэни-хамнаһы билистэ. Хаһаайыстыба базатын саҥардар үлэтигэр куорат дьаһалтата көмөлөһөргө бэлэмин биллэрдэ.
Раиса СИБИРЯКОВА, “Саха сирэ” хаһыат, edersaas.ru