“Сиибиктэ” – Ньурба улууһугар биир улахан уонна үлэтинэн-хамнаһынан биллэр-көстөр бааһынай хаһаайыстыба.
Любовь уонна Степан Ивановтар быйыл 170 сүөһүнү, ол иһигэр сүүстэн тахса ынаҕы, кыстаттылар. Онон, быйылгы төрүөхтүүн аахтахха, 250-тан лаппа таһаарар туруктаахтар.
“Сиибиктэлэр” маҥнай хаһаайыстыба тэринэллэригэр сибиинньэ иитиититтэн саҕалаабыттара. Ийэ сибиинньэни 40 төбөҕө тиийэ тута сылдьыбыттара гынан баран, “сибиинньэ тумуутунан” сылтаан ирдэбил күүһүрбүтүн иһин, эһэн бараннар, 2000 сылтан ыла ынах сүөһүгэ көспүттэрэ.
“Мин бэйэм Өҥөлдьөҕө төрөөбүт-үөскээбит киһибин, ыанньыксыт оҕотобун итиэннэ идэбинэн даҕаны ынах сүөһүгэ сыһыаннаахпын”, — диир зооинженер идэлээх, сопхуоска үлэлээбит Любовь Васильевна.
Ивановтар аҕыйах сыллааҕыта Алтайтан кыһыл истиэп боруода 40 уулаах тиҥэһэни атыылаһан аҕалбыттара, бэлиэр, үһүстээн төрүөх биэрдилэр. Бастакы ньирэйдэрэ ситэ-хото охсон, төрөөн эрэллэр. Хаһаайыстыба хотуна кэлии сүөһүлэр Саха сирин тыйыс айылҕатын ыарырҕаппыттарын бэлиэтиир эрээри: “Олус үчүгэй майгылаахтар, сымнаҕастар, аламаҕайдар, киһини сыллыы-сытыккыы сылдьаллар. Быаны-өтүүнү туттубаппыт, баайбаппыт. Хотонноруттан ырааппаттар, үөрдэриттэн ойдубаттар”, — диэн чэй иһэ-иһэ хайгыыр.
“Алтайкалар” үүттэрэ дэлэгэй: күҥҥэ 20 киилэни ыатар ынах элбэх, ортотунан 15-18 киилэ буолар. “Сиибиктэ” хаһаайыстыба быйыл 250 туонна үүтү туттарарга квота ылбыт. Ол гынан баран, улуус киининээҕи “Байар” потребительскай кэпэрэтиип үлэтэ-хамнаһа үөтэлээбэккэ, улуус үрдүнэн соҕотуопка боппуруоһа моһуоктаах соҕус буолбут. Холобур, “сиибиктэлэр” үүттэрин Бүлүү өрүс уҥуор олорор “Күндээдэ” агрофирма “Влада” кэпэрэтиибигэр туттараллар, оттон эбэ быһар кэмигэр Дьаархаҥҥа “Вилмар” кэпэрэтиипкэ илдьэллэр.
Үүтү ынахха аҥаардас хоччоххой оту хаалаан ылбаккын. Степан Иванов былырыын сайын Ньурбатааҕы “АгроМТС” тэрилтэлиин кыттыһан, 180 туонна сиилэһи укпут омуһаҕын көрдөрө-көрдөрө кэпсээтэ. Манна сыһыаран эттэххэ, “Сиибиктэ” производствотын сайыннарар туһугар үбүн-харчытын харыстаабакка угар. Ньурба куораттан чугас эстибит сопхуостан хаалан турбут тутууну, 15 мөл. солк. суумалаах үбү уган туран, аныгы матырыйаалынан саҥалыы сөргүппүтэ. Уруккута бурдукка аналлаах эбийиэк буолан уонна хаһаайыстыба сүөһүтэ эбиллэн, мантан инньэ кыараҕас буолууһу диэн көрдүм.
Ханна даҕаны курдук, үчүгэй үлэһит көстөрө сыанан-арыынан аҕаабат. Ол даҕаны буоллар, “Сиибиктэ” бааһынай хаһаайыстыба уонча киһини үлэлэтэн, хамнастаан олорор. “Хайыахпытый, баччалаах оҥостон-туттан баран, үлэлиирбитигэр эрэ тиийэр буоллахпыт”, — диир күлэ-оонньуу хоһуун үлэһит, “Сиибиктэ” хаһаайыстыба сиһэ, өһүөтэ Степан Васильевич.
Василий НИКИФОРОВ., https://edersaas.ru