Сууттан-силиэстийэттэн куота-саһа сылдьар дьону туттулар

Ааптар: 
Бөлөххө киир:

Суукка аайы өрөспүүбүлүкэ үрдүнэн Росгвардия харабыллыыр салаатын 60-ча патруллуур бөлөҕө сулууспалыы тахсар. Бу полицейскайдар эбийиэктэри харабыллыыр эрэ буолбатахтар, — кинилэр бэрээдэги-сокуону кэспит, холуобунай ирдэбилгэ сылдьар дьону буларга-тутарга, буруйу арыйыыга ис дьыала уорганнарыгар төһүү буолаллар.

edersaas.ru

Ол курдук, Дьокуускай куорат Октябрьскай уулуссатыгар дьахтардаах эр киһи Росгвардия полицейскайдарын көрөөт, дьиэ анныгар куоппуттар. Буруйа суох киһи тоҕо куота оонньуоҕай, туох эрэ аньыылаах буолан, атахха биллэрэр буоллаҕа — туппуттар — 36 саастаах дьахтар сууттан саһа сылдьар эбит.

Аны  Можайскай уулуссаҕа 52 саастаах киһини туппуттар — олорор сириттэн ханна да барыа суохтаах, кэтэбилгэ сылдьар киһи эбит.

Бу оройуоҥҥа өссө биир эдэр киһини туппуттар — полиция массыынатын көрөөт, суолу туораан, хаамарын түргэтэппит, онон, уорбалааһыҥҥа киирэн биэрбит — киин куорат 28 саастаах олохтооҕо силиэстийэ уорганнарыттан куота-саһа сылдьар эбит.

Эмиэ Октябрьскай уулуссаҕа туппут 44 саастаах киһилэрэ Бүлүү полициятын дознаниеҕа салаатын ирдэбилигэр сылдьара биллибит — хаайыыттан босхолонон баран, кэлбит сиригэр учуокка турбатах.

От ыйын саҥатыгар «6»-с оптуобуска федеральнай ирдэбилгэ сылдьар киһи айаннаан иһэрин туһунан иһитиннэрии киирбит — бу силиэстийэттэн саһа сылдьар киһини Билибин уулуссатыгар тутан, полиция отделыгар илдьибиттэр.

Сайыҥҥы икки ый устатыгар росгвардеецтар ирдэбилгэ сылдьар 11 гражданины тутарга көмөлөспүттэр.

Бу туһунан РФ Росгвардиятын Саха сиринээҕи управлениетын пресс-сулууспата иһитиннэрдэ.

Биһиги корр., «Саха сирэ» хаһыат, edersaas.ru

Хаартыска: интэриниэттэн

+1
0
+1
0
+1
0
+1
0
+1
0
+1
0
+1
0