РФ Силиэстийэлиир кэмитиэтин Саха сиринээҕи управлениетын салайааччыта, юстиция генерал-майора Олег Мезрин «баран эрэр үһү» диэн сурах муус устар бүтүүтүн диэкиттэн тарҕаммыта.
Вера МАКАРОВА, «Саха сирэ» хаһыат, edersaas.ru
Онно төрүөтүнэн «Москубаттан бэрэбиэркэҕэ кэлбит тойотторун силиэдэбэтэллэр бириэмийэ харчыларынан маанылаабыттара-күндүлээбиттэрэ» буолбут диэн этэ. Ону чуолкайдаары, Силиэстийэлиир управлениеттан ыйыталаһа сылдьыбыппытын, «уоппускатыгар сылдьар» диэн хоруй ылбыппыт.
Оттон бэҕэһээ, ыам ыйын 1 күнүгэр, дойду бэрэсидьиэнэ Владимир Путин 192 №-дээх ыйааҕынан, кэккэ регионнар ис дьыалаҕа, силиэстийэҕэ уонна накаастабылы толорор уорганнарын салайар генераллара астаапкаҕа бардылар. Ол иһигэр, Олег Мезрин эмиэ.
«Бириэмийэ харчытын туттуу» чааһынан эттэххэ, РФ СК ССУ кадрга отделын начальнигар холуобунай дьыала тэриллибит. Дуоһунас боломуочуйатын аһара барыы бэлиэтэ баарынан.
Олег Мезрин Кировскай уобаластан төрүттээх, 1969 сыллааҕы төрүөх. Юридическай үрдүк үөрэхтээх. Саха сиригэр 2005 сыллаахха өрөспүүбүлүкэ борокуруорун солбуйааччынан ананан кэлбитэ. Ити дуоһунаска ананыан иннинэ, Кировскай уобаласка силиэдэбэтэлинэн, борокуруорунан үлэлээбитэ.
2007 — 2011 сылларга, силиэстийэ борокуратуура уорганнарыгар баар эрдэҕинэ, салайааччынан үлэлээбитэ.
Онтон 2011 сыллаахха силиэстийэ туспа баран, РФ Силиэстийэлиир кэмитиэтэ тэриллэн, кини Саха сиринээҕи управление салайааччытынан ананан, күн бүгүнүгэр диэри үлэлээн кэлбитэ.
Мезрин астаапкаҕа барбытын да иһин, Силиэстийэлиир управление официальнай http://ykt.sledcom.ru/ сайтыгар кини туһунан иһитиннэрии билигин да баар.
Салайааччылара астаапкаҕа барбытын Силиэстийэлиир управлениеҕа соһуйа ылыннылар. «Кини курдук үчүгэй салайааччы аҕыйах» диэччилэр элбэхтэр. Бакаа сурах быһыытынан, эмиэ «варяг» ананан кэлэр диэн иһитиннэрии баар.
Билигин управление салайааччытын эбээһинэһин быстах кэмҥэ Николай Алексеев салайар. «Пламеннай Артур» төрөппүт оҕото, бэйэбит уолбут. Управление салайааччытын бастакы солбуйааччытынан 2011 сыллаахтан үлэлиир (ол иннинэ — эмиэ итинник дуоһунаска, силиэстийэ борокуратуураҕа баар эрдэҕинэ).
Чахчыта да, Олег Мезрин барыыта олус соһуччу буолла.
Вера МАКАРОВА, «Саха сирэ» хаһыат, edersaas.ru
Хаартыскаҕа: хаҥастан бастакы — Николай Алексеев, билигин РФ СК ССУ салайааччытын эбээһинэһин быстах кэмҥэ толорооччу, иккис — Олег Мезрин.
Ааптар түһэриитэ.