Сайтпытыгар бу дьыл ыам ыйын 2 күнүгэр «Силиэстийэлиир управление салайааччыта суох хаалла. Ким ананыай?» диэн иһитиннэриим бэчээттэммитэ. Онно РФ Силиэстийэлиир кэмитиэтин Саха сиринээҕи управлениетын салайааччыта, юстиция генерал-майора Олег Мезрин «баран эрэр үһү» диэн сурах муус устар бүтүүтүн диэкиттэн тарҕаммытын, ол төһө оруннааҕын туһунан суруйбутум.
Оттон ыам ыйын 1 күнүгэр, дойду бэрэсидьиэнэ Владимир Путин 192 №-дээх ыйааҕынан, кэккэ регионнар ис дьыалаҕа, силиэстийэҕэ уонна накаастабылы толорор уорганнарын салайар генераллара астаапкаҕа барбыттара. Ол иһигэр, Олег Мезрин эмиэ. Билигин кини төрөөбүт дойдутун, РФ Силиэстийэлиир кэмитиэтин Кировскай уобаластааҕы управлениетын салайааччытын солбуйааччытынан ананан үлэлиир.
Олег Мезрин уурайбыт кэмигэр управление салайааччытын эбээһинэһин быстах кэмҥэ Николай Алексеев толорбута. Николай Артурович управление салайааччытын бастакы солбуйааччытынан 2011 сыллаахтан үлэлиир.
Оттон бүгүн биллибитинэн, РФ Силиэстийэлиир кэмитиэтин Саха сиринээҕи управлениетын салайааччытынан юстиция генерал-майора Александр Заболиченко анаммыт. Бу иһитиннэриини биһиги сайтпытыгар управление салайааччытын сонуннары киэҥник тарҕатар ситимнэри кытта үлэҕэ ыстаарсай көмөлөһөөччүтэ Надежда Дворецкая бигэргэттэ.
Александр Заболиченко 2011 сыл ыам ыйыттан РФ Силиэстийэлиир кэмитиэтин Сахалиннааҕы управлениетын салайааччытынан үлэлээбит. Кини салайар кэмигэр 2015 сыллаахха Сахалин уобалаһын губернатора Александр Хорошавин хоруупсуйаҕа уорбаланан тутуллубута.
Саҥа салайааччы бу бээтинсэҕэ сулууспатыгар тахсар диэн иһитиннэрии оруна суох.
Вера МАКАРОВА, «Саха сирэ» хаһыат, edersaas.ru
Хаартыска: интэриниэттэн.