Элбэх оҕолоох дьиэ кэргэттэр сир учаастагын босхо ылалларыттан аккаастаналларыгар быраап бэрилиннэ. Ол оннугар «Дьиэ кэргэн» өрөспүүбүлүкэтээҕи Ийэ хапытаалын сууматын икки төгүл улаатыннартарыахтарын сөп.
edersaas.ru
Маннык быраап үс эбэтэр онтон элбэх оҕолоох (2017 сыл ахсынньы 31 күнүгэр диэри төрөөбүт), сир учаастагын ылар уочаракка турбут ыалга бэриллэр. Онон, сайабылыанньаны биэрии 2018 с. ахсынньы 31 күнүгэр диэри уһатылынна.
Сайабылыанньаны биэрээччилэргэ усулуобуйалара:
– «Дьиэ кэргэн» хапытаалын харчытын туһана илик эбэтэр 15 тыһыынча кээмэйдээх биир кэмнээх төлөбүрү ылбыт дьон;
– «Дьиэ кэргэн» хапытаалын харчытын дьиэ-уот усулуобуйатын тупсарыыга (өрөмүөнтэн ураты) ыытар буоллахтарына;
– Атыы-эргиэн дуогабарыгар олоҕуран, олорор дьиэни атыылаһыы төлөбүрүгэр тутталларыгар;
– Олорор дьиэни тутуу төлөбүрүгэр;
– Олорор дьиэни ыларга кирэдьииккэ эбэтэр сойуомҥа (ипотеканы киллэрэн туран) иэһи эбэтэр төлөбүр бырыһыанын сабарга;
– Олорор дьиэни атыылаһарга эбэтэр туттарга бастакы төлөбүрү оҥорорго.
Сайабылыанньалары Дьокуускай куорат уокуруктааҕы дьаһалтатын баайга-дуолга уонна сиргэ сыһыаннаһыыларга департаменын докумуоннары тутар түннүгэр ылаллар.
Аадырыстара:
Дьокуускай к. Октябрьскай уулусса 20/1 дьиэтэ, 1 этээс, 2 №-дээх түннүк. Бэнидиэнньиктэн бээтинсэҕэ диэри күннэргэ 9.00-17.00 ч. диэри (тохтобула 12.30-14.00) үлэлииллэр.
Надежда ЕГОРОВА, «Саха сирэ» хаһыат, edersaas.ru