Соторутааҕыта Сочига чөл олох форума буолла. Саха сирин дэлэгээссийэтин Зоя Константиновна уонна Карл Георгиевич Башариннар салайан илдьэ сырыттылар.
edersaas.ru
Тэрээһиҥҥэ дойду уопуттаах исписэлиистэрэ, арыгылааһын билигин да улахан хоромньуну оҥоро турарын бэлиэтээтилэр. Холобур, 2017 сылга арыгылааһын, табахтааһын уонна наркоманнааһын түмүгэр дойду экэниэмикэтигэр 3,6 триллион солк. хоромньу оҥоһуллубут. Кэлиҥҥи 25 сылга Арассыыйаҕа 40 мөлүйүөн эр киһи күөгэйэр күнүгэр сылдьан, суорума суолланна. Кэлиҥҥи сылларга ыччат арыгыһыт буолуута элбээн эрэрин эмиэ бэлиэтээтилэр. Онтон да атын киһи уйулҕатын хамсатар сидьиҥ түгэннэри ахтан аһардылар.
Уопсайынан, бүтүн Арассыыйаҕа Саха сирин арыгылааһыны утары үлэҕэ уопута элбэх киһини сэҥээрдэр. Ол курдук, биһиэхэ саамай элбэх нэһилиэк (186) арыгы атыытын сокуонунан бобон олорор. Бу хамсааһын билигин да салҕанар. Форумҥа дойду чэчирии сайдарыгар, нэһилиэнньэ доруобуйата, сиэр-майгы тупсарын наадатыгар арыгылааһыны утары үлэ күүскэ барыахтааҕын тоһоҕолоон эттилэр. Ону таһынан баар уопуту дойду эрэгийиэннэригэр тарҕатыы наадатын ыйдылар. Биһиги өрөспүүбүлүкэбит уопута форум резолюциятыгар киирбитин ситиһиинэн сыаналыахха сөп.
Саха сирин 19 киһилээх дэлэгээссийэтэ олус таһаарыылаахтык кыттан, элбэх уопуту иҥэринэн кэллэ. Дэлэгээссийэ чилиэннэрэ уопсайа 6 дакылааты оҥордулар. Тэрээһин бырагырааматын Саха сириттэн тиийбит «Павловские вечерки» ансаамбыл олус киэргэппитин иһин форум кыттыылаахтара махтаннылар.
Күндү Сахабыт сирин олохтоохторун өссө төгүл норуоппут инники дьылҕатын саныаххайыҥ, ыччаттарбытын чөл олохтоох буоларга иитиэххэйиҥ диэн ыҥырабын. Арыгыны атыылаһымаҥ, арыгы — дьаат.
Матвей ЛЫТКИН, «Саха сирэ» хаһыат, edersaas.ru