Өрөспүүбүлүкэ социальнай сайдыытыгар – федеральнай субсидия

Бөлөххө киир:

Кэлиҥҥи кэмҥэ Уһук Илин экономикатын сайыннарыыга дойду бэрэсидьиэнэ Владимир Путин улахан болҕомтотун уурар. Ону олоххо киллэрэргэ регионнааҕы инвестиционнай бырайыактар, ТОР-дар тэриллэн үлэлииллэр.

edersaas.ru

Ил Дархан э.т. Айсен Николаев өрөспүүбүлүкэҕэ экономическай сайдыы социальнай инфраструктуратын тэрийэргэ федеральнай субсидия бастакы төлөбүрэ 1 млрд 700 мөл. солк. түспүтүн туһунан РФ Үпкэ миниистирин Антон Силуановы кытта көрсүһүү кэмигэр эттэ. Бу харчы Дьокуускай куоракка 35 №-дээх оскуола тутуутун бүтэрэргэ, Нерюнгрига хомунаалынай хаһаайыстыба ситимин саҥардарга, оҕо поликлиникатын хапытаалынай өрөмүөнүгэр, Хаандыгаҕа элбэх хайысхалаах гимназия саҥа дьиэтин, Орто Халымаҕа улахан спортивнай киин тутарга туттуллуоҕа.

Ол туһунан бүгүн от ыйын 10 күнүгэр СӨ экономикатын миниистирин э.т. Майя Данилова иһитиннэрдэ.

“Саха сирин социальнай сайдыытын былаана ити үөһэ этиллибит сууманан хааччахтаммат. Онкоклиническай, кардиологическай диспансердар иккис уочаратын тутуулара былааҥҥа киирэн тураллар. Бу эбийиэктэри бигэргэммит былааҥҥа киллэрэр туһунан билигин РФ Доруобуйа уонна Үп министиэристибэлэрин кытта кэпсэтии бара турар. Ол  Уһук Илин уонна Байкальскай эрэгийиэн социальнай-экономическай сайдыытын судаарыстыбаннай бырагырааматын иһинэн үбүлэниэхтээх”, — диэн эттэ кини.

Айсен Николаев бу күннэргэ Москва куоракка командировкатын чэрчитинэн федеральнай министиэристибэ салайааччыларын кытта көрсүһүүгэ сылдьар. Бэҕэһээ от ыйын 9 күнүгэр РФ Үпкэ миниистирин Антон Силуановы кытта көрсөн, өрөспүүбүлүкэҕэ харчыны тыырыы, хоту табаары тиэйии үбүлээһинин, инвестиционнай бырагыраама туолуутун тула кэпсэттэ.

Марианна Тыртыкова, «Саха сирэ», edersaas.ru

+1
0
+1
0
+1
0
+1
0
+1
0
+1
0
+1
0