close
Удьуор суоппардар Соловьевтар
Олох-дьаһах - Саха ыала

Удьуор суоппардар Соловьевтар

Билигин кэрэ аҥаардар араас массыынаны ыыталларын көрөн улаханнык соһуйбат да буоллубут, урукку курдук сөҕүү-махтайыы намыраата. Ол эрээри, дьиэ кэргэнинэн удьуордаан бары уруулга олорор ыал сэдэхтик көстөр.

Бүгүҥҥү дьоруойум Татьяна Соловьева: «Массыына ыытарга баҕа эрэ буолбакка, талаан наада», – диэбитин бастаан дьиибэргии иһиттим…

edersaas.ru

«Запорожецтан» – «Хайска»

Нам улууһун киин балыыһатын терапияҕа отделениетыгар 1986-2011 с. сиэстэрэнэн үлэлээбит Татьяна Владимировна биэнсийэҕэ тахсан баран, олоҕун укулаатын тосту уларыппыта. Үс оҕотун атаҕар туруорар туһуттан уонна олох-дьаһах да тосту уларыйан, дьиэ кэргэнинэн бизнеһинэн дьарыктанарга санаммыта. Онтон бэттэх дьоҕус маҕаһыын арыйан, нэһилиэнньэ күннээҕи наадатыгар туттар хаһаайыстыбаннай табаардарын тутуу матырыйаалыгар диэри тиэйэн аҕалан, Нам олохтоохторугар атыылаабыттара сэттис сылыгар барда.

Нам уонна Дьокуускай куорат икки ардыгар маннык сылдьарыгар бэйэ массыыналааҕа дьыала улахан аҥаарын быһаарар. Дьолго, кэргэнэ Эдуард Михайлович Соловьев 1 кылаастаах суоппар.

Татьяна Владимировна Намҥа «кырдьаҕас суоппардар» ахсааннарыгар киирсэр. Татьяна уруулга олорор хорсун санааламмытыгар аҕатыгар махтанар. Аҕата, бастакы кылаастаах суоппар, ийэтэ үөрэҕирии туйгуна, Учууталлар учууталлара. Ийэтэ, төһө да 80-с хаарыгар үктэннэр, билигин кыыһын сымнаҕас массыынатыгар олорсон, куоракка балтыгар киирэн тахсар. Кини үлэлиир кэмигэр начаалынай кылаастарга элбэх оҕону хомус тардарга үөрэппитин күн бүгүҥҥэ диэри махтана ахталлар.

«Аҕам 1970-с сылларга бастакы «Урал» массыыналары аҕалбыт киһи. Улахан баҕайы көлүөһэлээх массыыналар дьиэбит таһыгар кэлэн туралларын уонна ол массыыналары кытта грецкэй эриэхэ аҕалбытын өйдүүбүн. Мин уруулга олоруум миигиттэн үс сыл аҕа убайым бэлисипиэдигэр, мопедыгар, онтон «Восход» матасыыкылыгар мэҥэстэртэн саҕаламмыта быһыылааҕа. Убайбыттан көҥүллэтэ барбакка, бэйэм тахсан собуоттуур этим. Итинник сылдьан көрөн үөрэммитим. Аҕам эмиэ массыынатыгар илдьэ сылдьара, ону көрөн үөрэнэр эбиккин. Дьиҥэр, миигин ким да анаан-минээн үөрэппэтэҕэ», – диэн Татьяна Соловьева сэһэргиир.

Кини аан бастакы көлөтүн – кыһыл «Запорожец» массыынаны 1998 с. Алдантан сүүрдэн аҕалбыта. Онно өссө ыал буола илик, сиэстэрэлии сылдьар кэмэ этэ. Массыына ылар быраап ылан эрэ баран, кэргэн тахсыбыта. Онон, «Урал» матасыыкыллаах уол уонна «Запорожецтаах» кыыс холбоспуттара. Оттон билигин Татьяна Владимировна сарсыардата «Хайс», онтон Эдуард Михайлович пургуон массыынаҕа олорууларыттан саҕаланар. «Сэмээр киэн тутта саныыр кыыһым Аня бэйэтэ массыыналаах. Эмиэ биһигини көрөн үөрэммитэ», – диэн Анастасия Заболоцкая ыҥыран, 2012 сылтан кыыһыныын «НамАвтоЛеди» уонна хаар күрэҕэр кытталларын туһунан кэпсиир. «Автоледига» предприниматель, араас талааннаах кыргыттар, дьахталлар мустан, өрөспүүбүлүкэ тэрээһиннэригэр көхтөөхтүк кытталлар, бэйэлэрин ааттарын күргүөмнээхтик ааттаталлар.

«Массыынаны ким баҕарар бэйэтэ үөрэнэн ыытыан сөп. Ол гынан баран,  кылаабынайа, талаан наада. Ол эбэтэр дьиҥ талааннаах киһи эрэ ханнык баҕарар массыынаҕа (аптамаакка эрэ буолбакка) олордо да, тута ыытар уонна холкутук сылдьар», – диэн баран, сэһэргэһээччим остуолу тоҥсуйан ылла.

«Сыыстахпына, бырастыы гыннарабын»

Татьяна СОЛОВЬЕВА:

«Киһи тыыннааҕын тухары син биир бэйэтин көрдөнөр. Эйиэхэ эрэ анаммыт баар буоллаҕа. Үлэ уонна дьиэ эрэ диэн кыһалҕалаах сылдьар тутах. Ол да иһин буолуо, биһиги дьиэ кэргэнинэн бииргэ олоро түстүбүт да, маҕаһыыммытын өссө хайдах тупсарарбытын, дьоммутун-сэргэбитин хайдах үөрдэрбитин, ханна баран сынньанарбытын толкуйдуубут.

Оҕолорум аҕаларынан киэн тутталлар. Биһиги аҕабыт сатаабатаҕа диэн суох, маһы хаамтарбат эрэ. Тиэргэммит толору тиэхиньикэ, ону барытын бэйэтэ өрөмүөннүүр. Тиэхиньикэ алдьанан, сүүрбэккэ турбута диэн суох.

Оҕолорбутун иитиигэ улахан кистэлэҥмит суох. Оҕолорбор куоласпын кыратык улаатыннарбыт да буоллахпына, толкуйдаан баран, бырастыы гыннарабын. Кылаабынайа, оҕоҕо эрэниэххэ наада. «Мин оҕом үчүгэйи-куһаҕаны араара сылдьар инигин. Тугу эмэ оҥоруоҥ иннинэ, кэлин туох буолуон сөбүн толкуйдаан баран оҥорор буол», – диэн эрэ этэбин уонна хонтуруоллаан кэтии-маныы сылдьыбаппын.

Бу олоххо кими да кытта кыыһырсыбакка, өс-саас туппакка, хомоҕой өйүнэн олоруохха наада. Оҕолорбутун үөрэххитигэр кыһаллыҥ диэн улаханнык кыһарыйбатахпыт. Кылаабынайа, оҕо киһи быһыытынан хаачыстыбата уонна доруобуйата улахан суолталаах дии саныыбын.

Надежда ЕГОРОВА, «Саха сирэ» хаһыат, edersaas.ru

#бүгүн: 1
1
0

Сайт матырыйаалларын ааптар көҥүлэ суох ылар бобуллар.


Notice: Undefined index: comment_notes_before in /var/www/edersaas/wp-includes/comment-template.php on line 2334

четыре + 1 =