Бүгүн Өксөкүлээх Өлөксөй аатынан Норуоттар доҕордоһууларын дьиэтигэр Арассыыйатааҕы норуоттар икки ардыларынааҕы «ПроРФ: Про Россию! Про тебя!» эстафета-аахсыйа ыытылынна.
edersaas.ru
«ПроРФ» хамсааһын бу сыл саҕаланыыта тохсунньуга Арассыыйа омуктарын дьыалаларын федеральнай агенствота көҕүлээһининэн тэриллибитэ. Уопсастыбаннай хамсааһын сүрүн соруга – норуоттары сомоҕолуурга үлэлиир уонна гражданскай көҕүлээһиннэри өйүүр тэрилтэлэри уонна сойуустары дойду таһымыгар түмүү.
— Бүгүн Саха сиригэр олорор араас омук дьоно мустан, Арассыыйа норуоттарын кытта биир сомоҕолоһуулаахтарын биллэрэр тэрээһиҥҥэ кыттыылара олус улахан суолталаах. Ол курдук, өрөспүүбүлүкэбитигэр норуоттар доҕордоһуулара күүстээҕин биллэрэн туран, биһиги ыраас хаkлааннаах, сырдык ыраас сааскы күҥҥэ Волгоград уобалаһыгар Норуоттар сомоҕолоһууларын эстафетатын туттарабыт, — диэн эттэ Ил Дархан Егор Борисов флешмоб кыттыылаахтарыгар туһаайан.
Гражданскай уопсастыба институттарын сайдыытын миниистирэ Анатолий Бравин бэлиэтииринэн, сонун сүүрээни өйүүргэ туһуламмыт «ПроРФ: Про Россию! Про тебя!» араас омуктары түмэр аахсыйа туһунан Арассыыйа омуктарын дьыалаларын федеральнай агенствота бэйэтин интернет-саайтыгар таһаарбыта. Ол ону бастакынан Псков уонна Саха сирэ, Волгоград уобалаһа өйөөбүттэрэ. Ол иһин аахсыйаны бу үс регион саҕалаата. Биһиги өрөспүүбүлүкэбит Псков кэнниттэн туппут «ПроРФ: Про Россию! Про тебя!» эстафетатын бүгүн Волгоград уобалаһыгар туттарда. Регионнартан биир бастакынан аахсыйаҕа кыттарга сайаапка түһэрбит биир куорат кыттыыны ылар. Онон Уһук Илин регионтан Дьокуускай куорат эрэ кыттар. Онон Саха сирэ эмиэ бастакылар ахсааннарыгар киирсэн, Арассыыйа суолталаах тэрээһиҥҥэ кыттыыны ылар чиэскэ тигистэ.
Эстафета Татарстаҥҥа, Ставропольскай кыраайга, Ямало-Ненецкэй автономнай уокурукка, Омскай уонна Москва куораттарга ыытыллан баран, олунньу 23 күнүгэр Крымҥа түмүктэниэҕэ.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа ааптар түһэриитэ.