Уу ресурсаларын федеральнай агентствотын Өлүөнэ сүнньүнээҕи ууга управлениетын чахчыларынан, Витим – Дьокуускай учаастагынан суукка иһигэр Өлүөнэҕэ уу таһыма 67 см намтаата.
Мантан аллараа өрөспүүбүлүкэ өрүстэригэр бүгүҥҥү балаһыанньаны көрдөххө, Алдаҥҥа Охотскай Перевоз – Батамай учаастагынан суукка иһигэр уу 120 см эбилиннэ.
Индигиргэ уу эбиллэ турар. Уус Ньара бөһүөлэгин аннынан уу таһыма 596 см тиийдэ (кутталлаах таһыма 650 см). Чугастааҕы күннэргэ уу таһыма үрдүөҕүн сабаҕалыыллар.
Алаһыайга билигин даҕаны балаһыанньа уустук. Орто Халыма улууһун дьаһалтатын иһитиннэриитинэн, Сыбаатайга уу таһыма 728 см тэҥнэстэ. От ыйын 25 күнүнээҕи туругунан, 18 тиэргэн ууга олоччу олорор.
Арҕахтаахха ааспыт суукка иһигэр уу таһыма 2 см эрэ түһэн, билигин 891 см. Манна кутталлаах таһым 777 см.
Андрюшкино бөһүөлэгин аннынан уу 5 см эбиллэн, 956 см тиийдэ. Алаһыайга уу таһыма өссө үрдүөҕүн билгэлииллэр.
Анивера АКИМОВА, «Саха сирэ» хаһыат, edersaas.ru