Дьокуускайга Перинатальнай киини тутуу түмүктэнэн эрэр. Билигин саҥа эбийиэги аныгы тэриллэринэн хааччыйыы, дьиэ таһынааҕы учаастагы тупсарыы үлэтэ бара турар. Эбийиэккэ суукканы быһа симиэнэнэн 300-чэ киһи үлэлии сылдьар.
Бырайыак уопсай суумата 3,2 млрд солкуобайга тэҥнэстэ.
edersaas.ru
Бастакы ыарыһахтары көрсүөхтэрэ
Перинатальнай киин бу сыл алтынньытыгар үлэҕэ киириэхтээх. Бастакы ыарыһахтар ахсынньыга ылыллыахтара.
Саҥа эбийиэк 130 куойкалааҕыттан 90 – акушерскай, 40 – саҥа төрөөбүт уонна болдьоҕун иннинэ төрөөбүт оҕолор отделениелара.
Каадырдар элбэҕи быһаарыахтара
Каадырдар боппуруостара тэҥинэн быһаарыллар. Барыта 500-тэн тахса саҥа үлэ миэстэтэ (ол иһигэр, 137 быраас, 245 орто медицинскэй сүһүөх үлэһит, 119 – алын сүһүөх үлэһит) таһаарыллара былааннанар.
СӨ Доруобуйа харыстабылын министиэристибэтэ 2014 с. Перинатальнай кииҥҥэ анаан каадырдары бэлэмниир уонна үөрэтэр туһунан бирикээһэ тахсыбыта. Онон, киин институттарга 60 акушер-гинеколог, неонатолог, анестезиолог-реаниматолог идэлэрин үрдэттилэр. 26 быраас интернатураҕа, 29 быраас клиническэй ординатураҕа үөрэннэ. Ону сэргэ, өрөспүүбүлүкэҕэ медицинскэй орто үөрэх кыһаларын бүтэрбит исписэлиистэр Перинатальнай кииҥҥэ ананнылар.
Туһата элбэх буолуоҕа
Киин үлэлээһинэ, бастатан туран, кырачаан оҕо уонна ийэ өлүүтүн аҕыйатыаҕа, ыарыыны, оҕо сыыһа сайдыытын сэрэтэр үлэлэр ыытыллыахтара.
Киин аныгы инновационнай технологиянан сэбилэниэҕэ, оҕо күүтэр дьахталларга уонна кырачааннарга сөптөөх усулуобуйа тэриллиэҕэ. Исписэлиистэр этэллэринэн, төрүүр оҕо ийэтин хаатыгар сылдьан сайдыыта хонтуруолга ылыллыаҕа, сайдыыларыгар араас дьиэктээх оҕолор төрүүллэрэ, болдьоҕун иннинэ күн сирин көрбүт оҕолор инбэлииккэ тахсаллара аҕыйыаҕа.
Надежда ЕГОРОВА, «Саха сирэ» хаһыат, edersaas.ru