Соторутааҕыта Бүлүү улууһун баһылыга Сергей Винокуров салайааччылаах анал дэлэгээссийэ Татарстан киинэ Казань куоракка сырытта. Сырыы сүрүн сыалынан-соругунан олохтоох бэйэни салайыныыга уопут атастаһыы, дьыалабыай хабааннаах кэпсэтиилэри ыытан салгыы бииргэ үлэлииргэ далаһаны быраҕыы буолар.
Александр ТАРАСОВ, «Саха сирэ» хаһыат, https://edersaas.ru
Казань куоракка көрсүһүү «төгүрүк остуол» чэрчитинэн ыытылынна. Анарааҥҥылар өттүлэриттэн Татарстан Өрөспүүбүлүкэтин Муниципальнай тэриллиилэр сэбиэттэрин бэрэссэдээтэлэ Минсагит Шакиров көрсөн, тустаах Сэбиэт үлэтин сиһилии билиһиннэрдэ.
«Билиҥҥи туругунан Татарстаҥҥа 956 муниципальнай тэриллии баар. Олохтоох бэйэни салайыныы боппуруостарын быһаарыыга сүрүн оруолу территориальнай уопсастыбаннай бэйэни салайыныы ылар. Иккис сылын «Татарстан өрөспүүбүлүкэтигэр саамай үчүгэй уопсастыбаннай управление» диэн куонкуруһу тэрийдибит. Маны сылын аайы ыытар үтүө үгэскэ кубулутаары гынабыт. Куонкурус пуондатын грана 50 мөл. солк. Татарстан муниципальнай тэриллиилэрэ нэһилиэнньэттэн тус сыаллаах үлэни ыытыыга харчыны күүскэ хомуйаллар. Бу анал бырагыраама буолар. Ол курдук, гражданнартан барыта 173,7 мөл. солк хомулунна. Бу үбү суолу оҥорууга, нэһилиэнньэлээх пууннары, өйдөбүнньүктэри саҥардыыга, тупсарыыга туһанабыт», – диэн Минсагит Закирович билиһиннэрдэ.
Дэлэгээссийэ Татарстаҥҥа тыа хаһаайыстыбатын салаата хайдах үлэлиирин ыкса билистэ. Татарстан тыатын хаһаайыстыбатын миниистирин бастакы солбуйааччы Николай Титов тыа хаһаайыстыбатын туругун билиһиннэрдэ уонна агропромышленнай комплекс туһунан анал киинэни көрдөрдө.
Кини: «Татарстан тыа хаһаайыстыбатын бородууксуйатын оҥорон таһаарыыга көрдөрүүтэ куһаҕана суох. Холобур, сылга 500 тыһ. тонна эт, 1 млрд 200 мөл. устуука куурусса сымыыта атыыланар, 1 мөл 750 тыһ.тонна үүт ыанар, 1 мөл 200 тыһ. тонна хортуоппуй хостонор. «Ак Барс холдинг» 400 тыһ. кэриҥэ гектар иэннээх бааһыналаах», – диэн киэн тутта кэпсээтэ.
Көрсүһүү түмүгүнэн, Бүлүү улууһа уонна Татарстан Өрөспүүбүлүкэтэ бииргэ үлэлииргэ быһаарыы ылыннылар. Бүлүү улууһун дэлэгээссийэтэ Татарстаҥҥа сылдьан, ордук тыа хаһаайыстыбатын өттүгэр элбэҕи билэн-көрөн төнүннэ.
