РФ бэрэсидьиэнэ Владимир Путин социальнай көмөҕө наадыйар дьоҥҥо биирдэ бэриллэр төлөбүртэн дохуоттан тутуллар нолуогу (НДФЛ) тохтотор туһунан сокуоҥҥа илии баттаата.
edersaas.ru
Аадырыстаах социальнай көмөҕө наадыйар киһи федеральнай, өрөспүүбүлүкэтээҕи, олохтоох бүддьүөттэн биирдэ бэриллэр төлөбүрү (ол иһигэр материальнай көмөнү) ыларыгар НДФЛ нолуогуттан босхолонор.
Сокуон бырайыагын Москва уобалаһын дуумата киллэрбитэ. Бу кыаммат дьоҥҥо өйөбүл биир көрүҥэ.
Санатар буоллахха, быйылгыттан социальнай көмөнү биэрэргэ анал киритиэрийдэри киллэрбиттэрэ. Урут киһи тиийинэн олоруу алын кээмэйиттэн кыра дохуоттаах буоллаҕына, араас төлөбүрдэринэн, көмөнөн туһанар бырааптаах этэ. Онтон билигин хас да киритиэрийгэ хапсар эрэ буоллаҕына, бэриллэр. Киритиэрийдэргэ хас дьиэлээҕиҥ, массыыналааҕыҥ, ынахтааҕыҥ, социальнай балаһыанньаҥ, төһө дохуоттааҕыҥ барыта учуоттанар.
Ангелина Васильева, “Саха сирэ” хаһыат, edersaas.ru