close
«Биир ньыгыл Арассыыйа» спикергэ Александр Жиркову тоҕо туруорбата?...
· - Олох-дьаһах - Тыа сирэ

«Биир ньыгыл Арассыыйа» спикергэ Александр Жиркову тоҕо туруорбата?

«Биир ньыгыл Арассыыйа» политическай баартыйа Саха сиринээҕи эрэгийиэннээҕи салаатын балаҕан ыйын 22 күнүгэр ыытыллыбыт уочарата суох конференциятыгар икки боппуруос көрүлүннэ. Бастакыта, балаҕан ыйын 9 күнүгэр быыбарга кыттыы түмүгэ, иккиһэ — Ил Түмэн Бэрэссэдээтэлигэр кандидатураны туруоруу.

edersaas.ru.

Балаҕан ыйын 9 күнүгэр ыытыллыбыт быыбарга өрөспүүбүлүкэ үрдүнэн 320 тыһ. 771 киһи быыбардыыр быраабын туһанна. Ил Дархан быыбарыгар «Биир ньыгыл Арассыыйа» туруорбут хандьыдаата Айсен Николаев 71 % куолаһы ылан, кыайыылааҕынан таҕыста. Ил Түмэн быыбарыгар өрөспүүбүлүкэтээҕи испииһэгинэн 160 тыһ. 71 киһи, ол эбэтэр быыбардааччы 50,84 %-ын куолаһын ылан, «Биир ньыгыл Арассыыйа» баартыйа бастаата, иккис миэстэни КПРФ (19,44 %), үсүһү «Сиэрдээх Арассыыйа» (16,34 %), төрдүһү ЛДПР (9,5 %) ыллылар. Онон баартыйа испииһэгинэн «Биир ньыгыл Арассыыйа» 20, хомуньуустар 7, «сиэрдээхтэр» 5, ЛДПР 3 мандааты ыллылар. Оттон биир мандааттаах быыбардыыр уокурукка «Биир ньыгыл Арассыыйа» 23, «сиэрдээхтэр» 3, хомуньуустар 2, ЛДПР уонна «Гражданскай платформа» биирдии мандааттаннылар. Маны таһынан үс киһи (Иван Данилов, Руслан Федотов, Арсентий Николаев) бэйэтэ туруорунан, дьокутаат буолла уонна «Биир ньыгыл Арассыыйа» фракциятын састаабыгар киирэргэ сайабылыанньа биэрдилэр. Ол түмүгэр, «Биир ньыгыл Арассыыйа» политическай баартыйа VI ыҥырыылаах Ил Түмэҥҥэ биир мандааттаах быыбардыыр уокуругунан 26, партийнай испииһэгинэн 20, холбоон 46 дьокутааттанна.

Быыбарга улуустар көхтөөхтүк кыттыбыт буоллахтарына, промышленнай улуустар көһүүннэрин көрдөрдүлэр. Кэлэр өттүгэр үлэни-хамнаһы итини учуоттаан тэрийэр ирдэнэрин туһунан «Биир ньыгыл Арассыыйа» политическай баартыйа Саха сиринээҕи эрэгийиэннээҕи салаатын сэкирэтээрэ Сахамин Афанасьев бэлиэтээтэ.

Конференция Ил Түмэн Бэрэссэдээтэлин кандидатуратыгар икки киһини (Петр Гоголевы уонна Александр Сусоевы) туруорда. Дьокутаат Елена Голомарева ааспыт ыҥырыылаах Ил Түмэн Бэрэссэдээтэлинэн таһаарыылаахтык үлэлээбит Александр Жирков кандидатуратын эмиэ киллэрэргэ эттэ. Онуоха Ил Дархан э.т. Айсен Николаев Александр Николаевич спикер буолара буоллар, мин үөрүөм этэ, ол эрээри кини аккаастанарын биллэрдэ, тоҕо итинник быһаарыммытын Ил Түмэн сиэссийэтигэр бэйэтэ сиһилии быһаарыаҕа диэтэ, бу биэс сылга парламент үлэтин салгыырга итиэннэ өссө күүһүрдэргэ сокуону төрдүттэн билэр киһи наадатын ыйан туран, Петр Гоголевы сөптөөҕүнэн аахта.

Кистэлэҥ куоластааһыҥҥа баартыйа сүүс чилиэнэ кыттыбытыттан, хас да бүлүтүөн марайданан, дьиҥэ суоҕунан билиниллэн, 91 бүлүтүөн ааҕылынна. Түмүккэ Петр Гоголев 77 %, Александр Сусоев 14 % куолаһы ылбыттара быһаарылынна. Онон, «Биир ньыгыл Арассыыйа» политическай баартыйа Саха сиринээҕи салаатын уочарата суох конференцията «Биир ньыгыл Арассыыйа» политическай баартыйа фракциятыттан VI ыҥырыылаах Ил Түмэн спикерин дуоһунаһыгар  Петр Гоголев кандидатуратын киллэрэргэ быһаарда.

Ыспыраапка

Петр Васильевич Гоголев – 1971 с. Уус Алдан улууһугар Бороҕон сэл. төрөөбүтэ. 1989-1991 сс. аармыйаҕа сулууспалаабыта, 1992-1997 сс. СГУ юридическай факультетыгар үөрэммитэ. 1997 сылтан ХИФУ юридическай факультетыгар ыстаарсай преподаватель, доцент, декан, юридическай наука дуоктара. РФ үрдүк профессиональнай үөрэҕин бочуоттаах үлэһитэ.

2002 – 2007 сс. – Дьокуускай куорат Дууматын дьокутаата, сокуоннаска, олохтоох салайыныыга уонна регламеҥҥа сис хамыыһыйа бэрэссэдээтэлэ.

2001 – 2004 г.г. – СӨ Бэрэсидьиэнин уонна дьаһалтатын олохтоох салайыныыга департаменын консультана, өрөспүүбүлүкэ бэрэстэбиитэлин быһыытынан «Арассыыйа Федерациятыгар олохтоох салайыныыны тэрийии сүрүн принциптэрин туһунан» федеральнай сокуону бэлэмнээһиҥҥэ үлэлээбитэ.

Раиса Сибирякова, «Саха сирэ», edersaas.ru

#бүгүн: 1
0
2

Сайт матырыйаалларын ааптар көҥүлэ суох ылар бобуллар.