Спорду кытта айылҕаҕа тапталы дьүөрэлээбит тириэньэр

Ааптар: 
Бөлөххө киир:

Хас биирдии  киһи айылҕаттан бэриллибит талаана, дьоҕура хаһан да сүтэн-симэлийэн хаалбат. Син-биир кини баарын биллэрэн киһиэхэ ураты эйгэни, күүһү киллэрэр.

Быйыл алтынньы 18  күнүгэр Саха Өрөспүүбүлүкэтин үөрэҕириитин туйгуна, элбэх биллэр спортсменнарга суол арыйан биэрбит учуутал,  биэс оҕо аҕата Петр Петрович Попов 50 сааһын туолуохтааҕа. Петр Петрович Сунтаар улууһун Хадан нэһилиэгэр күн сирин көрбүтэ.

Оҕо эрдэҕиттэн көҥүл тустуунан дьарыктаммыта. Кинини Саха АССР үтүөлээх тренерэ, көҥүл тустууга РСФСР  чөмпүйүөнэ Альберт Захаров  дьарыктаабыта.

Нам улууһун иккис дойду оҥостубута

1991 сыллаахха күтүөт аатын сүгэн, Нам улууһугар көһөн олохсуйа кэлэр. Эҥсиэли хочотун кэрэ айылҕатын сөбүлээн, үтүө-сэмэй дьонун көрөн, Нам улууһун иккис дойду оҥостон олорбута.

Оччотооҕу оскуола дириэктэрэ Варвара Дьяконова көҕүлээһининэн, кинини физкультура учууталынан  үлэҕэ ылбыттара. Ону куруук махтана саныыра. Дьоҕурдаах киһини өйөөһүн, киниэхэ итэҕэйэр бэлиэлэрэ этэ. Тоҕо диэтэххэ, Петр Петрович физкультура учууталын анал үөрэҕэ суох этэ, онон кинини үлэҕэ ылбыттара өссө элбэх саҥа күүһү, элбэх санааны үөскэппитэ. Кэлин дьоҕурун сайыннаран, Саха государственнай университетын физкультура салаатын бүтэрбитэ.  Кини үлэлиирин саҕана оскуола оҕолоро эт-сиин өттүнэн сайдан, араас күрэхтэһиилэргэ үрдүк ситиһиилэри көрдөрөн барбыттара. «Снежный барс», строевой хаамыыга улуустааҕы, өрөспүүбүлүкэтээҕи күрэхтэһиилэргэ Түбэ оҕолоро иннилэрин кимиэхэ да биэрбэт этилэр. Аны туран, күрэхтэһиигэ эрэ буолбакка, атын улуустар нэһилиэктэрин кытта шефтэһэр көрсүһүүлэри Кэбээйи Батамайын, Уус Алдан Дүпсүнүн, Найахытын кытта олохтообута.

Байыаннай кылааһы арыйбыта

Кэлин Нам сэлиэнньэтин иккис нүөмэрдээх орто оскуолатын иһинэн арыллыбыт улууска бастакы байыаннай-патриотическай кылааһы салайбыта. Уол оҕо төрөөбүт дойдутун устуоруйатын таптыырын, ытыктыырын туһугар күүһүн-күдэҕин биэрэн туран үлэлээбитэ. Үөрэппит, такайбыт оҕолоро өрөспүүбүлүкэ, Бүтүн Арассыыйатааҕы күрэх­тэһиилэргэ, олимпиадаларга ситиһиилээхтик кыттыбыттара. Оҕолору үөрэтэригэр теориянан, кинигэҕэ суруллубут суругунан-бичигинэн эрэ муҥурдаммат этэ. Бастатан туран кини, оҕо ону-маны көрөн, чинчийэн, илиитинэн, этинэн-сиининэн билэн, таарыйан көрдөҕүнэ биирдэ дириҥник үөрэнэр эйгэтигэр киирэр диэн этэрэ. Ол иһин Петр Петрович үөрэтэр оҕолорун айылҕаҕа сырытыннаран, сүүрдэн, араас моһоллору, үрэхтэри-күөллэри туораттаран, сыырдары-аппалары дабайан илдьэ сылдьыбыта. Уол оҕо дойдутун, сирин-уотун ытыктыыр, айылҕаҕа тахсан сир-дойду иччилэриттэн көрдөһөн-ааттаһан сирин, аал уотун аһатан, өбүгэлэр үөрэхтэрин иҥэрэрэ.

Кыайыыга кынаттаабыта

Саха оҕото өбүгэлэрин оонньууларын билэрин, дьарыктанарын туһугар, 2002 сылтан «Үрүҥ Уолан» диэн улуустааҕы күрэхтэһиини сөргүппүтэ. Бу күрэх­тэһии улуус спорка сайдыытыгар улахан кылааты киллэрбитэ. Бу күрэхтэһииттэн кынаттанан Туймаада ыһыаҕын “Дыгын оонньууларын” алта төгүллээх кыайыылааҕа Николай Дьяконов, хас да төгүллээх призера Артем Варданян, өрөспүүбүлүкэ күүс­тээх многоборецтара, мас тардыһааччылара Антон Тойтонов, Андрей Тюнгюрядов, Дьулус Охлопков  уонна да элбэх спорт маастардара тахсыбыттара.

Николай Попов, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0