“Модун” спорт комплекс мас тардыһыыга тренерэ Николай Константинов дэгиттэр кыахтаах спортсмен. Боксаҕа ССРС спордун маастарыгар хандьыдаат. Саха АССР норуоттарын спартакиадатын призера (1981), СГУ икки төгүллээх чөмпүйүөнэ. Пауэрлифтиҥҥэ Россия спордун маастара. Иллэрээ сыл Курскайга аан дойду кубогар бэтэрээннэргэ 75 киилэҕэ тэҥнээҕин булбатаҕа.
Ити күрэхтэһиигэ 207,5 кг ыйааһыннаах штанганы көтөҕөн дьону соһутан турар. Ол эрээри, бэйэтин кытта кэпсэтэн биллэххэ, бу көрүҥҥэ тус бастыҥ көрдөрүүтэ – 215 кг эбит. Ону тэҥэ мас тардыһыыга СӨ спордун маастара. Өрөспүүбүлүкэ хас да төгүллээх чөмпүйүөнэ, Манчаары спартакиадатын икки төгүллээх кыайыылааҕа, Саха сирин норуоттарын спортивнай оонньуутун икки төгүллээх призера.
Николай Элляевич аҥардас 2016 сылга спорка ситиһиитин эттэххэ, мас тардыһыытыгар уонна пауэрлифтиҥҥэ Саха сирин чөмпүйүөнэ, Александр Кузнецов кэриэһигэр өрөспүүбүлүкэтээҕи турнир кыайыылааҕа. Уоллаах кыыһа спордунан эмиэ утумнаахтык дьарыктаналлар. Ол курдук, Сергей мас тардыһыыга спорт маастара. Спорт бу көрүҥэр кэлиэн иннинэ кикбоксинынан, панкратионунан, көҥүл тустуунан, армрестлинынан дьарыктана сылдьыбыта. Өссө армрестлиҥҥэ Уһук Илин ФУо чөмпүйүөннээбитэ. Былырыын Сергей мас тардыһыыга 70 киилэҕэ Нальчик куоракка ыытыллыбыт Кавказ кубогар уонна Намҥа буолбут өрөспүүбүлүкэ чөмпүйэнээтигэр бастаабыта. Россия чөмпүйэнээтин боруонса призера.
Оттон Намыына ХИФУ 1-кы курсун устудьуона. Эмиэ мас тардыһыынан дьарыктанар. Спорт маастарыгар хандьыдаат. Намыына 2016 сылга Нам улууһун чөмпүйүөнэ, өрөспүүбүлүкэ уонна Россия эдэрдэргэ күрэхтэһиитин кыайыылааҕа, ХИФУ ректорын кубогар бастакы миэстэлээх. Саха сирин муҥутуур кыайыылаахтарын быһаарар түһүлгэҕэ бэйэтин бөлөҕөр иккис буолбута. Манна даҕатан эттэххэ, Намыына 2013 сыллаахха Россия кыргыттарга күрэхтэһиитигэр бастыы сылдьыбыта.
Спортивнай дьиэ кэргэн ийэлэрэ Мария Афанасьевна спорка эмиэ чугас киһи. Кини СахаВА волейболиһа.
Дьэ, ити курдук, СӨ физическэй култуураҕа уонна спорка туйгуна, Нам улууһун бочуоттаах гражданина, “Гражданскай килбиэн” бэлиэнэн наҕараадаламмыт Н.Э.Константинов төрөппүт оҕолорун чөл, чэгиэн-чэбдик олоххо сирдээн киллэрэн, спорка угуйан, билигин дьиэ кэргэн иһигэр ким ханна хаста бастаабытыгар күрэстэһэллэр, мэтээллэрин ааҕаллар. Бу түгэн атыттарга үтүө холобур буолуохтун.
Петр ПАВЛОВ, «Саха сирэ» хаһыат, edersaas.ru
Владислав КОРОТОВ хаартыскаҕа түһэриилэрэ.