Спорт национальнай көрүҥнэригэр Академия сүрэхтэннэ

Ааптар: 
Бөлөххө киир:

2006 сыллаахха өрөспүүбүлүкэбит киин куоратыгар спорт национальнай көрүҥнэригэр Манчаары аатынан “Модун” спортивнай комплексы кытта тэбис-тэҥҥэ педагогическай наука доктора Валерий Пантелеймонович Кочнев аатынан төрүт көрүҥнэргэ уонна остуол оонньууларыгар Педагогическай оскуола аһыллыбыта. Бу сыллар усталарыгар бу оскуола спорт национальнай көрүҥнэрэ сайдалларыгар сүҥкэн үлэни ыытан кэллэ. Ол курдук, мас тардыһыы, хапсаҕай, сахалыы ыстаныылар саҥалыы тыыны ылан, киэҥ эйгэҕэ таҕыстылар. Бу көрүҥнэринэн дьарыктааччылар уонна дьарыктанааччылар ахсааннара биллэрдик элбээтэ. Спортсменнарбыт Россия, Европа уонна аан дойду түһүлгэлэригэр ситиһиилээхтик кытталлар. Петр ПАВЛОВ, «Саха сирэ» хаһыат, https://edersaas.ru

Олохпут сайдан иһэр, биирдиилээн атын дойдулар биһиги көрүҥнэрбитин биһирээн, эриэ-дэхси көрдөрүүлэннилэр. Дьэ, манан сибээстээн, спортсменнары саҥалыы методиканан бэлэмнээһин систиэмэтигэр кэккэ уларытыылары киллэрэн, В.П.Кочнев оскуолата аны уларытыллан, Спорт национальнай көрүҥнэригэр Академия буолла.

Бу бэлиэ күҥҥэ анаан “Модун” спорт комплекска саҥа тэриллибит Академияны сүрэхтээһин пресс-конференцията буолла. Үөрүүлээх түгэҥҥэ спорт национальнай көрүҥнэригэр киинин дириэктэрэ, Ил Түмэн дьокутаата Иннокентий Юрьевич Григорьев, СӨ спорка миниистирин бастакы солбуйааччы Семен Сергеевич Чердонов уонна, биллэн турар, Академия салайааччыта, профессор Валерий Пантелеймонович Кочнев эҕэрдэлээтилэр.

Саҥа тэриллибит Академияны спорка сыһыаннаах үөрэх атын тэрилтэлэрин кытта буккуйбаккытыгар көрдөһөбүн,диир Валерий Пантелеймонович. – Биһиги Академиябыт эбии үөрэхтээһининэн дьарыктанар. Саҥа методика быһыытынан конференциялары, семинардары, маастар-кылаастары ыытар. Академиябытыгар 3 наука доктора, 5 наука хандьыдаата бааллар. Онон састаап күүстээх. Сотору кэминэн өссө мас тардыһыы тиэмэтигэр икки наука хандьыдаатын бэлэмнээн таһаараары сылдьабыт.

Кырдьык да, маннык тэрээһин, дьаһаныы үчүгэйтэн атыны аҕалбата биллэр. Спорт национальнай көрүҥнэрэ биһиги сүрүн тирэхпит буоларынан, Академия аһыллан үлэлиирэ – биир уочараттаах үрдэл быһыытынан сыаналаныахтаах. Академия чилиэттэрэ номнуо үлэлэрин саҕалаабыттар, ол курдук, оскуолаҕа киириэн иннинээҕи саастаах оҕолорго остуол оонньууларын – хабылыгы, хаамысканы билиһиннэрбиттэр, үөрэппиттэр уонна күрэхтэһии тэрийбиттэр.

Ыспыраапка: Валерий Пантелеймонович Кочнев, педагогическай наука доктора, педагогическай үөрэхтээһиҥҥэ Норуоттар икки ардыларынааҕы наука уонна Хотугу форум Академияларын академига, Д.П.Коркин аатынан СӨ физическэй култуураҕа уонна спорка Судаарыстыбаннай бириэмийэтин лауреата, Саха АССР үтүөлээх тренерэ, РФ үрдүкү профессиональнай үөрэхтээһинин бочуоттаах үлэһитэ, ССРС уонна СӨ физическэй култууратын туйгуна, Учууталлар учууталлара, Ньурба улууһун бочуоттаах гражданина, Аҕа дойду Улуу сэриитин бэтэрээнэ. Билигин М.К.Аммосов аатынан ХИФУ иһинэн физическэй култуура уонна спорт институтун спорт национальнай көрүҥнэригэр уонна хотугу норуоттар оонньууларыгар кафедратын сэбиэдиссэйэ.

Петр ПАВЛОВ, «Саха сирэ» хаһыат, https://edersaas.ru

+1
0
+1
0
+1
0
+1
0
+1
0
+1
0
+1
0