Таатта улууһун чөл, чэгиэн олоҕу өрө тутар сүүрүктэрэ улуу бөлүһүөк, саха литературатын төрүттээччилэртэн биирдэстэрэ А.Е.Кулаковскай-Өксөкүлээх Өлөксөй төрөөбүтэ 140 сылыгар анаммыт ыһыахха Ытык Күөлтэн Чычымахха диэри сүүрбүттэр.
Бу туһунан улуус физкультураҕа уонна спорка кэмитиэтин салайар Гаврил Вырдылин иһитиннэрдэ. Уһуну сүүрүүгэ спорт бэтэрээннэрэ Филипп Гуляев, Владимир Сивцев, Никанор Слепцов, Владимир Находкин, Василий Слепцов уонна эдэр спортсмен Вадим Яковлев кыттыбыттар. Сарсыарда тоҕустан стартаабыттар уонна күнүс 14.00 чааска Чычымахха ыһыах түһүлгэтигэр тиийбиттэр. Уопсайа, 55 килэмиэтири сүүрбүттэр. Нэһилиэк дьоно-сэргэтэ сындалыйбат уһун тыыннаах спортсменнар маннык бэлэҕи оҥорбуттарыттан, кэнчээри ыччакка үтүө холобуру көрдөрбүттэриттэн улаханнык үөрбүт, махтаммыт.
Биһиги корр., “Саха сирэ” хаһыат, edersaas.ru
+1
+1
+1
+1
+1
+1
+1