Ыам ыйын 15 күнүгэр Саха Өрөспүүбүлүкэтин дэлэгээссийэтэ Россия биир күөҕүнэн чэлгийэр куоратыгар – Ставропольга сырыттыбыт. Манна 26-с төгүлүн ыытыллар Бүтүн Арассыыйатааҕы устудьуоннар саастара ыытылынна. Биһиги өрөспүүбүлүкэбит бу бэстибээлгэ 16-с төгүлүн кыттынна.
Саха сириттэн үҥкүүгэ, муусукаҕа, инструментальнай, оригинальнай жанрга кыттаары 39 буолан сырыттыбыт. Ставрополь куората биһигини сылааһынан угуттуу көрүстэ. Куорат олохтоохторо Устудьуоннар саастарыгар бэлэмнэнэллэрэ харахха быраҕыллар. Биһигини кураторбыт үөрэн мичилийэ сылдьар Анна куорат устун экскурсияҕа сырытыннарда.
Бу фееричнай шоуга 2000 киһи кытынна. Бэстибээлгэ уопсайа дойдубут 80 регионуттан 2700 устудьуон кэлбит. Ыам ыйын 16 күнүгэр биһиги устудьуоннарбыт муусука уонна үҥкүү хайысхатыгар, ону тэҥэ регионнааҕы бырагыраамаҕа кытыннылар. Ол курдук, “Кырдал кыыһа” ырыаны трио, Иоганн Матвеев “Туундара” ырыалары толордулар, оттон үҥкүүгэ ДьГТХА “Сандал” этно-фолк бөлөҕө “Тоҥ балык бырааһынньыга”, “Кыталык” бөлөх “Кыталыктар” үҥкүүлэри туруордулар. Майя Степанова “Якутяночка” үҥкүүтүнэн көрөөччүлэри абылаата. Маны сэргэ, араас маастар-кылаастар, кэнсиэртэр, флешмобтар буоллулар.
Ыам ыйын 17 күнүгэр куонкурус салҕаммыта. “Тэтим” инструментальнай бөлөх “Ирбэт тоҥ үрдүнэн” бырагырааматын көрдөрдө. Ону тэҥэ, биһиги бөлөхпүт дьоҕус тыйаатыр хайысхатыгар эдэр режиссер Динислам Тутаев А.Чехов “Три сестры” айымньытын туруорбутун бар дьон иннигэр таһаардыбыт. ЯТЭК устудьуона Игорь Шевченко “Дума” айымньыны аахта.
Ыам ыйын 18 күнүгэр “Кампус” муода тыйаатыра Айталина Софронеева-Охлопкова коллекциятын көрдөрдө. Александра Мокина Лара Фабиан репертуарыттан толордо.
Ыам ыйын 19 күнүгэр Саха Өрөспүүбүлүкэтин дэлэгээссийэтэ бириистээх миэстэлэргэ тиксэн, үөрүү-көтүү бөҕө буоллубут. “Сэргэлээх сулустара” трио, Өктөм ДьХТХА-тын устудьуона Иоганн Матвеев, “Тэтим” барабаан охсооччулар бөлөхтөрө, “Кампус” муода тыйаатыра бэстибээл кыайыылаахтарынан буоллулар. Уонна 1 степеннээх лауреат дипломун ыллылар. Автодорожнай факультет устудьуона Егор Сивцев 2 степеннээх лауреат дипломун туппута. ДьГТХА “Сандал” бөлөҕө фольклор үҥкүүтүгэр 3 степеннээх лауреат буолла. Киэһэ бэстибээли сабыы сиэрэ-туома уонна Гала-кэнсиэр элбэх көрөөччүнү түмтэ. Бу Гала-кэнсиэри “Тэтим” барабаанньыттар бөлөхтөрө арыйбыта улахан долгутуулаах, үөрүүлээх буолла.
Бу долгутуулаах күннэргэ Саха Өрөспүүбүлүкэтин дэлэгээссийэтэ “Сэргэлээх уоттара” култуура киинин дириэктэрэ, СӨ култууратын үтүөлээх үлэһитэ Светлана Рафаиловна Никифорова уонна “Саха сирин эдэр ыччатын общественнай сойууһун” бэрэссэдээтэлэ Алексей Павлович Данилов салалталарынан сырыттыбыт. Уопсай түмүккэ Саха сирин хамаандата Арассыыйа 80 регионун ортотугар 14 миэстэҕэ таҕыста. Маныаха ХИФУ ректора Евгения Исаевна Михайлова, ППОС бэрэссэдээтэлэ Александр Владимирович Сусоев өҥөлөрө улахан.
Светлана КОРКИНА, ХИФУ филологическай факультетын 4 кууруһун устудьуона.
«Саха сирэ» хаһыат, edersaas.ru сайтка анаан.