Алтынньы 28 күнүгэр “Сахамедиа” пресс-киинигэр СӨ бырабыыталыстыбатын бэрэссэдээтэлин бастакы солбуйааччы Алексей Александрович Стручков “Стерх” страховкалыыр хампаанньа лиссиэнсийэтин Арассыыйа киин баана төттөрү ылыытын туһунан брифинг ыытта.
—“Стерх” СХ лиссиэнсийэтин төттөрү ылыы туһунан ыйааҕы бэҕэһээ, алтынньы 27 күнүгэр, Арассыыйа Киин баана таһаарда. “Бу ыйаах — Арассыыйа киин баанын уонна хампаанньа сүрүн акционерын СӨ бырабыыталыстыбатын кытта бииргэ ылыныылара буолар. Сайын ыытыллыбыт бэрэбиэркэ түмүгүнэн, “Стерх” СХ үбэ-харчыта бигэ туруга суоҕа, халбаҥа быһаарыллыбыта. «Стерх» СХ үлэтин-хамнаһын бэрэбиэркэлиир быстах кэмҥэ тэриллибит администрация бүгүҥҥүттэн үлэтин саҕалаата. Онон 3-6 ый иһигэр хампаанньа үбүн-харчытын туругун туһунан отчуот оҥоһуллуоҕа итиэннэ хампаанньа салгыы үлэлиирэ эбэтэр моҥкуруукка барара быһаарыллыаҕа. Бу хампаанньаҕа страховкаламмыт “Осаго” уонна ипотека кирэдьиитин страховкалара бары сыыйа төлөнүөхтэрэ, — диэтэ Алексей Стручков. 2018-2019 сс. барыта 270 тыһыынча страховкалыыр дуогабар оҥоһуллубут, ол иһигэр 213 тыһыынча “Осаго” дуогабара.
Ньургуйаана ИВАНОВА, «Саха сирэ» хаһыат, edersaas.ru