Оруобуна 95 сыл анаара өттүгэр бастакы судаарыстыбаннай сахалыы тыллаах хаһыат күн сирин көрбүтэ. Оччотооҕу уодаһыннаах гражданскай сэрии кэмигэр 1921 сыллаахха ахсынньы 28 күнүгэр тахсыбыт «Манчаары» хаһыат бастакы нүөмэригэр «Саха, тоҥус бырааттар!» диэн эйэлээх олоххо ыҥырыы бэчээттэммитэ. 1922 сыл кулун тутар 19 күнүгэр Губбюро быһаарыытынан «Манчаары» РКП Губбюротун уорганын хаһыата буолбута, судаарыстыбаннай «Кыым» историята саҕаламмыта. 1993 сыллаахха бастакы президеммит Михаил Николаев алтынньы 13 күнүнээҕи ыйааҕынан «Саха сирэ» уонна «Кыым» хаһыаттар редакционнай кэлэктииптэрин холбоон туран, аныгы «Саха сирэ» хаһыат тэриллибитэ.
Судаарыстыбаннай бэчээт Саха Өрөспүүбүлүкэтэ баарын тухары сайда туруоҕа. Үйэ уларыйар. Олох тэтимнээхтик устар. Ол тухары судаарыстыбаннай хаһыат ытык иэһэ уларыйбат: судаарыстыбаннаһы бөҕөргөтүү, саха норуотун туһугар туруулаһыы, сөптөөх суолу ыйан-кэрдэн биэрии, дьон-сэргэ уонна киниэхэ сулууспалыыр былаас икки ардыгар киэҥ эрэллээх далаһа буолуу. Сэбиэскэй «Кыымы» утумнуур хаһыаппыт эһиил 40 тыһ. тахса тираһынан тарҕанан, бар дьон биһирэбилин өссө ылыаҕа диэн эрэнэбин.
Аныгы ирдэбилинэн интернеккэ сайт арыйан үлэлэтэн эрэбит. Ол курдук www.edersaas.ru диэн аадырыстаах сайтка айар кэлэктииппит сойбот сонуннарын, уһуну-киэҥи толкуйдатар ырытыыларын угуоҕа. Сайт ыччакка эрэ буолбакка, сахалыы тыыннаах, саха тыллаах бар дьоммутугар ананар. “Аах, көр, туһан» диэн слоганнаах сайпыт ахсынньыттан толору үлэлиэҕэ. Манна туһалаах матырыйааллары, интэриэһинэй кэпсээннэри, бэртээхэй интервьюлары булан уу сахалыы ааҕыаххыт.
Саха тылынан ааҕааччы баарын тухары «Саха сирэ» хаһыат эһиги тускутугар үлэлиэ-хамныа. Сырдык ыраны оҥорсор «Саха сирэ» хаһыаты кытта бииргэ буол! Информация киэҥ байҕалыгар мунума! Сахалыы тыллаах судаарыстыбаннай хаһыат 95 сылынан!
Чокуур ГАВРИЛЬЕВ