Бу дьыл алтынньы 4 күнүгэр Дьокуускай куорат федеральнай суутун судьуйата Николай Шевелев уруулга арыгы иһэн баран олорон, суол быһылаанын таһаарбыта.
Ол күн судьуйа бэйэтин «Мицубиси Паджеро» массыынатынан айаннаан иһэн, Бүлүүлүүр суол уонна Чайковскай уулуссаларын быһа охсуһууларыгар атын массыынаны саайан баран, тохтообокко, быһылаан сириттэн куоппут.
Ааһан испит ДПС массыынатын эмсэҕэлээбит суоппар тохтоппут. Куоппут джиби ДПС иниспиэктэрдэрэ Чайковскай уонна Каландарашвили уулуссалар быһа охсуһууларыгар тиийэн туппуттар.
Арыгы испитэ сирэйигэр-хараҕар, туттарыгар-хаптарыгар көстө сылдьар судьуйаны медицинскэй туоһулааһыны барарын эппиттэригэр, батынан кэбиспит. Киниэхэ РФ Административнай кодексатын 3 ыстатыйатынан боротокуол толорбуттар.
Судьуйаны эппиэтинэскэ Россия генеральнай борокуруора СӨ Үрдүкү суутугар ыыппыт представлениетынан эрэ тардыахха сөп.
Дьокуускай куорат федеральнай суутун пресс-сулууспата иһитиннэрбитинэн, судьуйа Николай Шевелев уоппускаҕа сылдьар. Оттон сонуннары киэҥник тарҕатар сорох ситимнэргэ кини астаапкаҕа барбытын туһунан суруйбуттар. Кини сайабылыанньатын Судьуйалар квалификационнай коллегиялара көрүөхтээх.
Оттон СӨ Борокуратуурата билигин бэрэбиэркэ ыытар. Матырыйааллар барыта хомуллубуттарын кэнниттэн РФ Генеральнай борокуратууратыгар хадатаайыстыба ыытыахтаах.
Биһиги корр., «Саха сирэ» хаһыат, edersaas.ru
Хаартыска: интэриниэттэн.