Сулҕаччылар оҕону олоҥхонон иитии суолтатын кэпсэттилэр

Ааптар: 
Бөлөххө киир:

Амма улууһун Сулҕаччы орто оскуолатыгар “Айыы намыһын ырыаһыттар” диэн бырайыак чэрчитинэн сонун тэрээһин буолла.

edersaas.ru


Саха сирин норуоттарын муусукаларын уонна фольклорун мусуойун наукаҕа  сотруднига  М.Корнилова үһүс сылын ситиһиилээхтик ыытыллар бырайыак ааптара  улуустааҕы үөрэх управлениетын кылаабынай исписэлииһэ  Клара Романовна Кириллина  буоларын бэлиэтээн этэр. Тэрээһин аан бастаан  Абаҕаҕа, иккис сылыгар Эмискэ ыытыллыбыт. Быйыл Сулҕаччыга тэриллибит тэрээһин сыалынан-соругунан Амматтан тахсыбыт улуу олоҥхоһуттар айар үлэлэрин билии, чинчийии, үөрэтии, кэнчээри ыччакка иҥэрии буолбут. Маны сэргэ, олоҥхо уус-уран тылын өйдүү, ылына үөрэниигэ, дьоҕуру сайыннарыыга, олоҥхону истиини тэрийиигэ улахан болҕомто ууруллубут.

Долгутуулаах улахан тэрээһин түһүлгэтигэр нэһилиэктэр оскуолаларыттан үөрэнээччилэр, учууталлар, уһуйаан иитээччилэрэ, оҕону сайыннарар киин  салайааччылара уонна сэргээччилэр, сэҥээрээччилэр түмсүбүттэр. Киэҥ кэпсэтиигэ Дьокускайтан А.Е.Кулаковскай аатынан норуоттар доҕордоһууларын дьиэтиттэн исписэлиис  У.Флегонтова,  Саха сирин норуоттарын муусукаларын уонна фольклорун мусуойун наукаҕа  сотруднига  М.Корнилова, улуустааҕы үөрэх салаатын исписэлииһэ К.Кириллина, о.д.а. кыттыбыттар. Түһүлгэҕэ саха норуотун тылынан айымньытын чыпчаала — олоҥхо туһунан кэпсэппиттэр, “Айыы намыһын ырыаһыттар” диэн бырайыак туох санааттан үөскээбитин быһаарбыттар, хайысхаларынан үлэлэргэ кыттыбыттар. Тэрээһин атах тэпсэн олорон эрэ санаа атастаһыытынан, сэһэргэһиинэн муҥурдаммакка, маастар-кылаастааҕа, быыстапкалааҕа ордук сэргэхсиппит.

“Кыптыый кэпсээнэ” бырайыакка үлэ уруогун учуутала С.Рязанская үөрэнээччитин С.Данилованы кытары олоҥхо дьоруойдарын кырыйан көрдөрөрү сэргэ, баҕалаахтары кырыйыы кистэлэҥэр үөрэппиттэр. Оттон “Чычып-чаап” уһуйаан иитээччитэ Р.Константинова баатаны сыһыартаан олоҥхо дьоруойдарын хайдах оҥорору көрдөрбүтүн, мустубут ыалдьыттар улаханнык сэргээн сүбэ-ама ылбыттар.

Дьокуускайдааҕы декоративнай-прикладной  кэллиэс бастакы кууруһун устудьуона Амантаай Григорьев оҕолорго үөрэнэр кыһатын туһунан кэпсээбитэ, НПК-ҕа кыттыы туохха наадалааҕын, көмөлөөҕүн быһаарбыта улахан болҕомтону тардыбыт. Ыйытыы биэрээччи үгүс буолбут.

Салгыы уолаттар “Бэргэн Боотур” хайысхаҕа сылдьан үҥкүүгэ үөрэммиттэр. Үҥкүү ис хоһоонун ырытыспыттар, сөптөөх хамсаныы киһиэхэ туһатын туһунан кэпсэппиттэр.

“Айар тыл абылаҥын” уонна чинчийэр үлэ киинин кыттыылаахтара оҕоҕо оскуолаҕа киириэн инниттэн олоҥхону өйгө-санааҕа, эккэ-хааҥҥа иҥэрии, остуоруйанан олоҥхону үөрэтии ньымаларын билиһиннэрбиттэр.

Тэрээһин кыттыылаахтара маннык хайысханан үлэлээһин хорутуута дириҥ буолуоҕар эрэммиттэр, улаханнык сэргэхсийбиттэр. Түмүккэ оскуола оҕолоро, учууталлар “Сулҕаччы уоттара” диэн анал хаһыат таһаарбыттар.

Биһиги корр., «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0