Дьокуускай куорат полициятын дьуһуурунай чааһыгар түүн үөһүгэр биир дьахтар эрийэн, кирилиэс былаһааккатыгар турбут кыыһын бэлисипиэтэ уорбуттарын туһунан иһитиннэрбит.
Уоруу тахсыбыт сиригэр кинолог сулууспа ыта Рекстыын тиийбитигэр, дьахтар бэлисипиэт ханан турбутун көрдөрөн биэрбит. Рекс сыт ылан, уоруйах суолун-ииһин батыһан, таһырдьа тахсыбыт уонна автодром диэки барбыт.
Кинолог банаар уотунан сырдатынан, ытын кэнниттэн батыһан, хаарга бэлисипиэт көлүөһэлэрин суола биллэр-биллибэттик тыргыллыбытын өйдөөн көрбүт. Уонна ол суолу батыһан, автодром олбуорун аанын таһыгар турар кураанах будкаҕа тиийбиттэр. Уоруйах бу будкаҕа саһан олорбута биллибит.
Сотору буолан баран, Рекс напарнигын Ильменскэй уулуссаҕа турар дьиэҕэ аҕалбыт, онно бастакы подъезка уоруллубут бэлисипиэт анал сомуогунан хатанан турарын булбуттар.
Уорууга уорбаланааччы — ити дьиэ биир кыбартыыратыгар олорор обургу оҕо эбит. Барыллаан быһаарыынан, кини бэлисипиэт сомуогун араас комбинацияны туттан сүөрэн, уоран барбыт.
Бу оҕоҕо иитэр-өйдөтөр миэрэ ыллыаҕа диэн СӨ ИДьМ-тын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыскалар: СӨ ИДьМ-тын пресс-сулууспата.