Быйыл Сунтаар улууһугар Тыа сирин үлэһитин сыла биллэриллибитэ. Ол чэрчитинэн араас хабааннаах тэрээһиннэр ыытыллаллар.
edersaas.ru
Улуустааҕы култуура салаатын начаалынньыга Мария Кобельянова, билигин үлэлии-хамныы сылдьар үлэһиттэри көҕүлээн бары эйгэҕэ сыл устата бастыҥнары ааттаталыылларын туһунан «Эдэр саас» сайтка кэпсээтэ.
Ол курдук, Учуутал күнүн улууска уратытык бэлиэтээн, бастыҥ үлэлээх учууталларга, иитээччилэргэ граннар туттарыллыбыттар.
— Бары оскуолалар, уһуйааннар үлэһиттэрэ биир сиргэ түмсэн бырааһынньыктаатылар. “Тыа сирин бастыҥ учуутала” уонна “Тыа сирин бастыҥ иитээччитэ” диэн улуус баһылыгын граныгар көрүү-күрэх тэрилиннэ. Улуус киинин уһуйааннарыгар 21 иитээччи араас ис хоһоонноох, оҕону кэрэҕэ иитэр сыаллаах дьарыктары, үөрэхтэри биэрэн улахан уопут атастаһыыта олохтонно. Манна өр сылларга үлэлээбит уопуттаах уонна саҥа саҕалыыр үлэһиттэр бары холоннулар. Күрэх түмүгүнэн бастыҥ ааты Маар Күөл нэһилиэгин “Кэнчээри” уһуйаан иитээччитэ Антонина Яковлева ылла. Киниэхэ 50000 солкуобай суумалаах грант туттарылынна.
Учууталлар күрэхтэригэр улуус оскуолаларын 20 бастыҥ учуутала кытынна. Икки күннээх тыҥааһыннаах күрэс түмүгүнэн бастыҥ ааты 30 сыл устата учууталлаабыт, Сунтаардааҕы политехническай лицей нуучча тылын учуутала Августина Чойнова ылыан ылла. 50000 солкуобайдаах баһылык гранын тутан, кыайыытын оҕолоругар уонна бииргэ үлэлиир үөлээннээхтэригэр анаата, — диэн Мария Кобельянова төлөпүөнүнэн сибээскэ тахса сылдьан кэпсээтэ.
Анивера АКИМОВА, » Саха сирэ» хаһыат, edersaas.ru