«Оттооҥ!» — диэбиттии, бэртээхэй күннэр тураллар. Сири-дойдуну кэрийэн көрдөххө, кэбиһиилэх от элбээн иһэр.
Өрөбүл күҥҥэ Сунтаар улууһун Күндэйэ нэһилиэгин Күчүгүй Эбэтигэр от бөҕөтө кэбиһилиннэ. Нээлбигэ оту соспут «Беларусь» тыраахтар тула уонча эр бэрдэ улахан бугуллары ыла-ыла быраҕалларын түсчүт бокуойа суох оннун булларар. Сыһыы ортотугар турар күрүөҕэ бэлиэр биир от ханыытын кэтэһэн чөмчөйөн турар. Бу кимнээх кэлэн Г.Н.Назароваҕа көмөлөһө сылдьалларын билээри тиийэн, кэпсэппитинэн бардым. Бары даҕаны толуу көрүҥнээх, күүстэрин-уохтарын үгэнигэр сылдьар эдэрчи, тыа дьонугар холоотоххо салгын харааччы сиэбэтэх сэбэрэлээх дьон үөрэ-көтө кэпсэттилэр. Салайааччылара улуус баһылыга Анатолий Григорьев бэйэтинэн кэлэн үлэлии-хамсыы сылдьар эбит.
— Хайа да нэһилиэккэ үүнүү үчүгэй, онон былаан туоларыгар эрэл баар, өссө саппааска оттуур сорук турар, — диир Анатолий Васильевич. — Ааспыкка кэлэ сырыттахпытына, бу хаһаайыстыба оту кэбиһэр дьоҥҥо наадыйарын эппиттэрин быһа гыммакка, кэлэн көмөлөһө сылдьабыт. Уонтан тахса от кэлииһи, төһө кыалларынан хойукка диэри үлэлиир былааннаахпыт. Атын нэһилиэктэргэ холоотоххо, күндэйэлэр оттуур сирдэрин күрүөлэнэн, бэркэ дьаһанан олороргутун хайгыахха сөп. Оттоммот ходуһалары болҕомтоҕо ылан, биригээдэ тэринэн саппааска оттуохха, эһиил хайдах дьыл кэлиэ биллибэт. Онон, бары күүһү окко уурабыт.
Күөл тула отчуттар чэй өрүнэр буруолара унаарыйар. Ол эрээри, оллоон таһыгар хотуур таптайар тыас иһиллибэт, илии хотуурун тыаһа сырдырҕаабат. Хата, от быыһыттан барбах быган көстөр Кытай тыраахтардара сүүрэкэлииллэр. Аныгы тиэхиньикэ күүһүнэн түргэнник, тэтимнээхтик оттуур сөп буоллаҕа. Ити эрээри, илии хотуурунан сирийэн отуур үгэһи умнубат үчүгэй этэ. Улууспут дьаһалтатын үлэһиттэрэ бэйэлэринэн бачыым көтөҕөн, өҥ ходуһалаах, уруккуттан да үрүҥ илгэни үрүйэлии сүүрдүбүт, сүөһүтүн, сылгытын тутан олорор, үлэһит үтүө дьонноох Күндэйэ сиригэр күүс-көмө, өйөбүл буола сылдьалларыттан бары да үөрэбит, махтанабыт!
Феврония НИКОЛАЕВА, Күндэйэ. “Саха сирэ” хаһыат, edersaas.ru сайтыгар анаан.