Үөһээ Мэйик – Сунтаар улууһун саамай кытыы сирэ, Мииринэй оройуонун кыраныыссатыгар сытар Бүлүүчээн нэһилиэгин учаастага.
Хаһан эрэ манна олох күөстүү оргуйара, билиҥҥи Бүлүүчээн нэһилиэгэр атыы-эргиэн киэҥник тэнийбит, үөрэхтээһин саҕаламмыт сирэ. Осетроваттан Трофим Васильевич Павлов (Попов), Тэрэппиин атыыһыт, таһаҕаһын тиэммит борохуоттар кэлэн Куруҥ Тумулга тиксэллэрэ.
Үөһээ Мэйиктэн Сахабыт сирин, ону ааһан, Бүтүн Арассыыйа сайдыыларын устуоруйатыгар киирбит ааттаах-суоллаах бэлиэ дьон үүнэн тахсыбыттара. Ол курдук, Тэрэппиин атыыһыт уолаттара Михаил Попов, Петр Павлов, сиэнэ Андрей Павлов, 16 сыл устата Сунтаар улууһун салайан олорбут, оройуон сэбиэтин бэрэссэдээтэлэ, Аҕа дойду Улуу сэриитин кыттыылааҕа Сергей Иннокентьевич Васильев, СӨ култууратын үтүөлээх үлэһитэ, Арассыыйа Бочуоттаах бэтэрээнэ Николай Николаевич Спиридонов-Дойду Ньукууһа, СӨ, РФ үтүөлээх бырааһа, медицинскэй наука доктора, өрөспүүбүлүкэтээҕи реабилитационнай киин генеральнай дириэктэрэ Юрий Павлович Степанов, саха аатын аан дойдуга ааттаппыт улуу скульпторбыт, СӨ искусствотын үтүөлээх деятелэ, П.А. Ойуунускай аатынан Судаарыстыбаннай бириэмийэ лауреата Эдуард Иннокентьевич Пахомов уо.д.а.
Эдуард Пахомов 2015 с. от ыйын 29 күнүгэр Орто Дойду олоҕуттан олус соһуччу, олус хомолтолоохтук барбыта. Кини бүтэһик үлэтинэн Дьокуускай куоракка «Туймаада саллаата» мемориальнай комплекс буолар. Бу үлэтин кытта тэҥҥэ дойдута Үөһээ Мэйик үтүөкэн дьонугар, дойдуну бүттүүнүн атыйахтаах уу курдук аймаабыт, уол аҕатын утары, аҕа төрөппүт уолун утары саа-саадах тутан сэриилэспит бутуурдаах-буккуурдаах Гражданскай сэрии уонна 1941-45 сылларга сэриигэ өлбүт хас эмэ уонунан мөлөйүөн дьон сырдык тыыннарынан, тыылга онтон итэҕэһэ суох буспут-хаппыт, өлөр өлүү аҥайар айаҕын өҥөйөн көрбүт үгүс дьон көмүс көлөһүннэринэн кэлбит Улуу Кыайыыны уһансыбыттарга аналлаах Ытык бэлиэни былааннаан оҥорбута. Ол үлэтин бу күннэргэ Э.И. Пахомов орто уола Вячеслав Пахомов, нэһилиэк баһылыга Геннадий Васильев иилээн-салайан, скульптор уруу-аймах дьонун, биир дойдулаахтарын көмөлөрүнэн иитиллэр эбэбит, Үс бүүрүктээх Бүтэй Бүлүү биэрэгэр туруордулар.
Эдуард Пахомов өр сылларга сүрэх ымыыта оҥостон, өйүгэр-санаатыгар бүөбэйдээн илдьэ сылдьыбыт, оҥорбут үлэтин ситэрдилэр, баҕа санаатын толорон былааннаабыт сиригэр, Үөһээ Мэйиккэ туруордулар.
От ыйын 29 күнүгэр Эдуард Пахомов суох буолбута үс сылын туолар. Ону көрсө, бүтэһик үлэтэ турда уонна көмүс уҥуоҕа көтөҕүллүбүт сиригэр Мэҥэ таас туруоҕа.
«Непревзойденный скульптор всех времён» диэн сүрэхтэммит улуу скульптор Микеланджело Буонаротти этэн, суруйан турар: «Творенье может пережить творца! Творец уйдёт, природой побеждённый, Однако образ им запечатлённый, Веками будет согревать сердца….».
Улуу Микеланджело эппитинии, скульптор Эдуард Пахомов киһини толкуйдатар, сэһэргэһиигэ ыҥырар дириҥ ис хоһоонноох үйэлээх үлэлэрэ былыт саппыт былыргы кэми сэгэтэн көрөргө көмөлөһөллөр.
Олоҕу саҥалыы хараҕынан көрөн, сонуннук ылынарга, ырыҥалыырга өйдөтө, үөрэтэ туруохтара, кини аатын ааттатан, өлбөт-сүппэт үйэлиэхтэрэ.
Александр КИРИЛЛИН,
Сунтаар улууһа, Бүлүүчээн нэһилиэгин художественнай галереятын сэбиэдиссэйэ.
Хаартыскаҕа ааптар түһэриитэ.