Сэтинньи 14-23 күннэригэр Сочи куоракка XIX аан дойдутааҕы ыччат уонна устудьуоннар бэстибээллэрэ үрдүк таһымнаахтык ааспытын бары да бэркэ билэбит. Бу улахан суолталаах тэрээһиҥҥэ Сунтаартан Тойбохой ыччатын лиидэрэ Екатерина Сидорова кыттыыны ылбытын туһунан киэн тутта кэпсиир.
edersaas.ru
Катя Сочига сырыыта бэйэтэ туспа устуоруйалаах. Ол курдук, 1985 сыллаахха тэриллибит ыччат бэстибээлигэр талисман быһыытынан «Катюша» буолбута. Ол ытык бэлиэ аатынан Катяны ийэлээх-аҕата ааттаабыттар. Катя Сочига баран талисман ааптарын кытта көрсөн билсибитэ, кини олоҕун умнуллубат түгэнэ буолар. Ол туһунан:
– Ыччат бэстибээлигэр Сунтаартан мин соҕотох баран кэлбитим улахан чиэс уонна дьол. Мин “Индустрии будущего 2030” былаһааккаҕа көхтөөх кыттыыны ыллым. Манна 2030 сылга диэри биһиги олохпут сайдар кэнсиэпсийэтин оҥордубут уонна туох-ханнык сайдыы төрүөттэрэ баар буолуохтарын ырыҥалаатыбыт: “Цифровой город”, “Фабрика компетенций”, “Здоровое будущее” бырайыактары ордук сэргээн иһиттибит. Иккис күммүтүгэр «Формирование образа будущего» бөлөҕүнэн үлэҕэ араас омук ыччаттарын кытары арахсан аны бырайыак оҥордубут. Маны таһынан «Общество и мировая политика. Форум молодых дипломатов» диэн Сергей Лавров иилээн-саҕалаан ыыппыт көрсүһүүтүгэр сылдьаммын аан дойду бэлиитикэтин кытары билистибит.
Аан дойдутааҕы ыччат уонна устудьуоннар бэстибээллэрин экспертэринэн Марко Ламбертини, Клод Лелуш, Ник Вуйчич, Мишель Легран, Дорон Авни курдук дьон үлэлээтилэр. Бу тэрээһиҥҥэ дойду бэрэсидьиэнэ Владимир Путин бэйэтинэн кэлэн, ыччаты кытта көрсүһүү олохтообута олус суолталаах.
Биир умнуллубат түгэним, 1985 сыллаахха Москва куоракка буолан ааспыт ХII Аан дойдутааҕы ыччат уонна устудьуоннар бэстибээллэрин «Катюша» талисман аатынан төрөппүттэрим “Катя” диэн ааттаабыттар эбит. «Катюша» талисман ааптарын Михаил Петрович Временконы кытары билсистим, истиҥник кэпсэттим, бэл, «НТВ» ханаалга интервью биэрдибит.
Бу үөрүүлээх, дьоллоох тэрээһиҥҥэ баран кэлбиппинэн олус үөрэбин уонна үлэбин сыаналаан ыыппыт Сунтаар улууһун ыччат уонна дьиэ кэргэн отделын салайааччытыгар Евгений Даниловка, бары үлэһиттэригэр миэхэ эрэнэн куоластарын биэрбит Сунтаар улууһун көхтөөх ыччатыгар, нэһилиэк ыччатын исписэлиистэригэр, олохпор саамай умнуллубат түгэннэри бэлэхтээбиккитигэр улахан махталбын тириэрдэбин!” – диэн үөрүүтүн үллэһиннэ.
1957 сыллаахха С.А.Зверев – Кыыл Уола тыа ыччатын ырыаҕа-үҥкүүгэ уһуйан, бу улахан тэрээһиҥҥэ кытыннарбыта, улахан ситиһиилэммитэ улахан кэпсэлгэ сылдьар, ол курдук биһиги Катябыт олоххо биирдэ бэриллэр кэрэ түгэҥҥэ көхтөөх ыччат буолан талыллан, аан дойду ыччатын кытта алтыспыт дьоллоох эдэр киһи!
Мария КОБЕЛЬЯНОВА – ТУСКУЛААНА