Cоторутааҕыта Иирэлээх үрэххэ “АЛРОСА” АХ драгаларын даамбатыгар саахал тахсан, бырамыысыланнаска туттуллубут кирдээх уу Бүлүү өрүскэ түспүтэ. Бу күннэргэ өрүс уута Сунтаар аннынан будулуйа устан, үүттээх чэй курдук өҥнөммүтүттэн олохтоохтор айманнылар.
Бүлүүчээн сэлиэнньэтин олохтоохторо иитэн-аһатан олорор эбэлэрин кытылыгар киирэн, кирдээх ууну бытыылкаларга кутан көрдөрө-көрдөрө, утаралларын биллэрэр аахсыйаны ыыттылар.
Атырдьах ыйын 24 күнүгэр Мииринэй куоракка Иирэлээх үрэххэ даамба саахалын туоратыы боппуруостарын тула СӨ айылҕа харыстабылын миниистирин э.т. Сахамин Афанасьев бэрэссэдээтэллээх мунньах буолла. Манна Сунтаар улууһун баһылыга Анатолий Григорьев, Арассыыйа Федерациятын Сэбиэтин чилиэнэ Александр Акимов, «АЛРОСА» АХ вице-бэрэсидьиэнэ, толорор дириэктэр Игорь Соболев, туһааннаах хонтуруоллуур уорганнар бэрэстэбиитэллэрэ кытыннылар. Мунньахха, элбэх ардах түһэн, котлованнар уунан туолан, даамбаны таһынан баран, Иирэлээх үрэххэ, салгыы Бүлүү өрүскэ киирэн, ол суотугар уу будулуйбута этилиннэ.
Мунньах түмүгүнэн, “АЛРОСА” саахалы түргэнник туората охсоругар, даамбаны оҥороругар уураахтаатылар. Хампаанньа суотугар Сунтаар улууһун нэһилиэктэрин иһэр уунан хааччыйар станциялары тутар туһунан кэпсэтии ыытылынна. Улуус баһылыга өр сыллар усталарыгар хампаанньа үлэтиттэн айылҕаҕа хоромньу тахсыбытын, нэһилиэнньэ эмсэҕэлээбитин бэлиэтээн туран, ууну ыраастыыр станциялары тутары сэргэ, Бүлүүчээн оскуолатын иһинэн Бүлүү өрүс уутун туругун кэтиир, чинчийэр лабораторнай пууну арыйары туруоруста. “Роспотребнадзор” управлениета алтынньыга диэри Бүлүү сүнньүгэр баар нэһилиэнньэлээх пууннарга уу хаачыстыбатын чинчийэр үлэни күүһүрдэригэр, “Росприроднадзор” айылҕа харыстабылын сокуонун тутуһууга былаана суох бэрэбиэркэни ыытарыгар модьуйдулар. Бу туруорсуулар мунньах боротокуолугар киирдилэр.
Айылҕа харыстабылын министиэристибэтэ Бүлүү, Иирэлээх, Оччугуй Ботуобуйа уутун бэрэбиэркэлииргэ күн аайы гидрохимическэй мониторины ыытар буолла. Чинчийии түмүгүнэн, өрүс уута ардах түһэн, буортан будулуйбут диэн кинилэр этэллэр.
Сунтаар улууһун баһылыга Анатолий Григорьев, Арассыыйа Федерациятын Сэбиэтин чилиэнэ Александр Акимов Мэйиккэ (Бүлүүчээҥҥэ) баран көрдүлэр-иһиттилэр. Мэйиктэн уу боруобата ылыллан, үс лабораторияҕа ыытылынна.
Билигин Сунтаар улууһун дьаһалтатыгар анал хамыыһыйа тэрилиннэ. Бүлүүчээн нэһилиэгин ыраас уунан хааччыйыы боппуруоһа быһаарыллар. Улуус кииниттэн ыраастаммыт уулаах “бодобуостар” барыахтара. Иирэлээх үрэхтэн түспүт кирдээх уу ааһыар диэри, ыаллыы нэһилиэктэртэн ыраас ууну таһаллара былааннанар.
Ангелина Васильева, “Саха сирэ” хаһыат, edersaas.ru